地獄同行

「生與死，不嬲都係一對。有生必有死，呢個係自然定律，就算再傷心都好，死人都唔會返生。既然係咁，點解抱住已死之人對你嘅愛，繼續行落去？」

***

當我醒返時，我已經身處喺呢個地方，呢度嘅所有嘢，都令人感到嘔心：空氣中彌漫住嘅嗰般嘔吐物嘅味道、彷彿可以直吹人心嘅寒風同埋隨地可見嘅骨頭。

呢種種跡象加埋，唔洗問都知我而家身處喺地獄，但係點解？

我明明冇做過任何傷天害理嘅事，甚至每個禮拜都會扶阿婆過馬路，究竟點解我會落到嚟地獄？最緊要嘅問題係，我係點樣死？





一諗到呢個問題，我個腦即刻好似畀人用力打咗一拳咁，劇烈嘅疼痛感令我完全有辦法思考。

我揈一揈頭，嘗試將啲痛楚驅逐出去。

而家就算再諗都冇用，唯有搵下有冇任何出口或者「員工」可以投訴一下。

第一次認真打量呢個地方，我先發現呢度嘅霧真係好濃，超過十米之外嘅地方已經畀霧完全遮住咗。

無計，我唯有盡力咁行，見步行步。





經過一、兩個鐘？我都唔知，地獄時間流逝嘅速度好似唔一樣。再者，我連呢度係唔係真係地獄都唔知，有可能係YouTube上面嗰啲整蠱節目？或者係人類未探究到嘅地方？又或者我係咪畀人捉咗去火星？

總之，過咗一段時間嘅步行之後，我終於見到一座矮矮地嘅山。

「係一望無際嘅平地上面無啦啦點會有座山？」抱住疑惑嘅我即刻急急腳跑去座山前。

喺跑緊嘅途中，我可以感覺到身邊冰凍嘅空氣進入我嘅肺度。呢種感覺好奇怪，好似有灘水由你嘅鼻流到肺部，令人難以呼吸。

因為咁，我跑咗兩步就冇再跑落去。





「咦？」我不禁發出咗疑問聲。係咪我睇錯，嗰座山嘅山腳下竟然有人？

再行近少少，我已經大概可以透過濃霧睇到佢。佢雙手畀人綁住喺半空，身上滿佈住血淋淋嘅傷痕，睇起嚟係冇幾耐之前整。

「你冇事呀嘛？」居然夠膽同一個咁可疑，甚至連樣都未見到嘅人講嘢，我都畀自己嚇親。

我同佢嘅距離已經唔到兩米，而家先可以清楚咁見到佢個樣。即使佢嘅頭髮畀灰塵覆蓋住，但係仍然可以睇到底下嗰種閃令令嘅金黃。

佢個樣生得非常靚仔，赤裸嘅上半身亦都見到肌肉，皮膚黝黑，不過可惜唔係我杯茶。

「你ㄧㄧ你係點樣嚟到呢度？」佢似乎對我嘅存在非常震驚。

「我都唔知。」我直言。

「冇可能......不過唔好講咁多先，你見唔見到我手上嘅鐵鍊？」





我點頭。

「幫我一個忙，滴一滴血落去。」