[愛情] [校園] [足球] 我鐘意左個第一句就講粗口嘅女仔: 24.

同曉瑩上到去，己經齊哂人，佢地一見到我地一齊上黎就起哂哄。

「嘩洗唔洗一齊上黎咁閃啊！」啊鋒首先大叫道

「黃曉瑩唔識路上黎，我咁岩未上到黎咪帶埋佢路囉！你問下啊柔，佢叫我去接㗎！」我解釋道

「有咁多巧合我都做左李家誠啦哈哈哈」啊銀都跟住啊鋒講

見佢地其他人都望住我同曉瑩偷笑，包括啊柔同啊羊





真係懷疑佢地係特登，啊羊都唔知係咪真係肚餓上黎先嘅

不過咁樣比人起哄都唔錯，起碼係黃曉瑩，好過啲我無感覺嘅人

唔知曉瑩點諗呢，佢會唔會同我一樣嘅感覺呢

好快佢地就各有各準備BBQ嘅野，我都去左幫手起爐

我同啊羊合力開哂兩個爐頭，見啊羊拍得好快好大力，佢應該真係好肚餓。





因為分開左兩個爐，所以我地都要分開兩班人坐，正當我想坐過去曉瑩坐緊嘅爐頭時候，已經見到曉瑩個邊嘅位已經無哂。

我死死氣坐左去隔離爐頭到，無得同曉瑩坐其實有啲唔開心，不過算啦，我又唔係佢邊個。

啊鋒見我坐低左都好快就介紹佢嘅朋友比我地識「介紹番先，佢係張芷桐，係B班嘅」啊鋒竟然帶女仔黎，可能佢地有啲野都唔定

「呢個係啊朱啊，佢都係我地中學嘅，不過大我地一級」啊銀都跟住介紹

「哈囉！叫番朱仔得啦！」「叫我啊桐就可以㗎啦」朱仔同啊桐都向我地打左個招呼





「Hello，我係啊朗！我隔離呢個係啊羊，同我，啊銀，啊鋒同一班嘅」我都介紹左啊羊

傾左陣計我地就去左攞野食燒，啊羊第一個就衝左上去拎野食燒

我一路食一路偷望住隔離爐頭嘅曉瑩，佢地三個女仔都好似有講有笑，仲有幾個新嘅男仔都望住曉瑩嘅方向笑得好開心

本來我以為自己會無咩事，但我的確個心係有啲唔舒服，好想坐過去同曉瑩傾計，呢啲係咪叫妒忌？

我無再望，坐多左陣就出去拎棉花糖燒

正當我出到去，拎緊棉花糖嘅時候，見到黃曉瑩都出左黎，佢拎住左塊麵包，行過黎同我講

「幫我攞舊大嘅棉花糖得唔得先～」曉瑩誠懇咁請求我

「唔得喎！等我拎哂啲大粒嘅先！」我講笑咁講，但其實心入面係有啲妒忌岩岩發生嘅事





「唔該啊鳴鳴～我係網上見到有個食法係將燒到半溶嘅棉花糖放落麵包到夾住食！好似好正㗎！」曉瑩興奮咁講

佢每次講起野食就好似個小朋友咁，跳下跳下，好得意

我都心軟左落黎「好啦好啦」

「不過！你要燒多舊比我連埋麵包一齊食，我都想試嘻嘻」我講

其實我唔係在意野食係點，只係我想佢係班男仔面前燒棉花糖比我食，哈哈好似好小學雞但我真係咁諗

「就咁話啦！你比兩舊大嘅我，我燒完一陣過黎比你！」曉瑩聽到我認承左都好開心咁講

我比左兩舊超大嘅棉花糖曉瑩，心入面未食就已經覺得好甜，嘻嘻





我番左埋位，見到曉瑩好專心咁燒緊佢嘅棉花糖，我都燒左兩舊棉花糖就咁食

「喂你地覺唔覺得個中文老師好戇鳩，個日超多人留堂」我番黎嘅時候啊鋒係到講

「真係喎，邊有可能一日內考番合格比佢」啊銀點頭認同

我聽到佢地講緊個中文老師都加入左對話「個日留堂我都係訓左係到做都無做哈哈」

「我都係喎！」啊鋒講

「你咁樣得唔得㗎，一陣唔合格留班點算！」啊桐突然話啊鋒

「無事嘅！最多你同我補下習啦，你中文咁勁嘻嘻」啊鋒溫柔咁同啊桐講

＂嗯，佢地兩個睇黎真係有啲野＂我自己同自己講





突然有人拍一拍我膊頭，我另轉頭係曉瑩

「食得啦～」佢手上拎住兩份麵包中間夾住左棉花糖

「黎啦！我地坐去側邊食？」我問佢

「好啊～」曉瑩點頭跟左我行

呢一幕比哂坐係兩個爐頭嘅人見到哂，包括啊鋒，不過佢竟然無大叫，可能佢都處理緊啊桐哈哈

我回頭望一望佢地，啊羊都用一個淫蕩嘅笑容望住我。

我同曉瑩坐左係側邊嘅空凳到，「我唔客氣啦～」曉瑩己經忍唔住食左先





我未食，因為我想睇下佢食完個反應係點

曉瑩食完一啖之後，雙眼變大，用一個甜美同滿足嘅笑容回答左我

「嘩！！！真係好好食㗎原來，你做咩未食嘅！快啲食啦」佢嘗試拎起我手上嘅麵包隊比我食咁

見到佢食完笑得咁甜，其實我就已經心滿已足，難得係呢到都有少少單獨相處嘅時間已經好開心。

佢講完之後我都放左舊麵包入口，棉花糖連埋麵包一樣入口即溶，好甜好好食。岩岩我自己燒嘅都無咁甜，哈哈。

我向爐頭一望，見到曉瑩個爐嘅男仔一直望緊我地呢一個方向，我就扮望其他野咁望番走，其實我係到暗爽緊，點都要比番啲滋味佢地睇。

BBQ都差唔多進入尾聲，但我估之後都會有下場，你都知啊鋒同啊柔佢地一定會諗下場有咩做，我都唔擔心咁快就完左今日嘅活動。