是咁的,我喺補習社見到個靚女: 2

「knock knock knock」 有人突然敲門
當阿Sir打開咗對門嘅時候

我望左一望，佢咪係我哋級個女神Kelly

啡啡地嘅頭髮，應該大嘅地方大，應該細嘅地方細

果然便服仲可以凸顯出佢嘅美貌

女神上氣唔接下氣咁入咗嚟





「對唔住，學校活動遲咗放 」佢同阿Sir解釋

阿Sir亦都冇點為難佢，所以就俾佢返咗位

「咦，係你呀 」女神同我打咗招呼

我哋平時喺學校都有傾吓計，所以都算熟

「係呀 我都比阿媽迫左過嚟補數學」我微笑着咁答佢，嘗試保持自然





咁當然女神就坐咗係我隔離，我對住後面班毒撚微笑，佢哋成班好似想殺咗我咁

然後過咗一個鐘頭之後，我哋就落咗堂

臨走嘅時候，我仲同Kristy 講咗再見，不過唔記得抄牌

一出到去嘅時候

Kelly伸咗個大懶腰





「你放咗之後有咩做」Kelly 問我

「冇咩搞作啊」我同佢講

「不如我哋一齊去食晏啦」女神講啦

有個咁好嘅機會，當然唔會放過啦

我控制內心嘅波濤洶湧

「好啊」

我同女神並排喺條街上面行





我哋兩個都係住喺土瓜灣區嘅而土瓜灣嘅係無好嘢食㗎
（帶定頭盔先：由於我哋兩個懶得行所以我哋喺附近幾條街搵嘢食）

而我哋間補習社就好近甘露甜品
（請支持黃店 佢哋啲嘢真係好好食 尤其是係沙嗲串燒 同埋佢哋啲咋喳糖水）

所以我哋就走去食

「佢哋嗰啲沙嗲串燒真係好好食 」女神食到成咀都係沙嗲醬

我喺我個袋入面攞咗包紙巾出嚟，並且俾咗幾張女神

「唔該晒」 佢笑住咁同我講

我心真係溶化了 佢好得意





當我哋食完嘢之後 女神就收到佢老豆嘅電話

話係時候返屋企了

我哋兩個簡單揮揮手就走咗

我又可以返屋企 展開專業毒撚嘅下晝 就係打成日機

當我返到屋企嘅時候

「今日補成點啊，有冇專心聽書啊」老母問

「有啊有啊」我答咗佢之後就返房開機





開完機之後 當我掙扎緊應該打R6 定係FIFA

我嘅兄弟 阿健 就DC打咗俾我

「打唔打FIFA」

二話不說 我即刻開咗FIFA嚟打

佢嘅愛隊就係熱刺

我嘅愛隊就係曼聯

所以平時基本上都係曼聯對熱刺

「今季輸咗六比一 俾我哋喎 曼狗食屎啦」佢串我





「哈利簡尼好似會來曼聯喎 」我又串番佢

基本上平時我哋就喺度互串大家

佢嘅打法係傳控足球，而我嘅打法就正正相反

防守反擊，所以經常都係我贏佢

打咗兩個幾鐘頭之後

「唔玩啦 冇手感 場場都輸」佢好嬲咁講

「輸波乃是人之常情，施主唔好搵藉口」我串番佢

「話時話聽講女神有仔喎」佢同我講

「唔知呢」我疑惑地問，同時間順手去IG望吓

「屌又真係喎」我同佢講

「快啲出嚟食飯啦，啲菜凍哂啦」老母喺出面大叫

「唔講啦去食飯 byebye 」我同阿健講

之後我就走咗出去食飯

有陣時真係唔知點解阿媽咁勁

可以同一時間整三個菜，仲要好好味

食完之後我就負責洗碗

我通常就一路洗碗一路唱歌

無盡空虛 似把刀鋒靜靜穿過心窩　　

期待的愛怎麼一生總不可碰到

真係好應景嘅啫

洗完碗沖埋涼

我今日都有少少攰所以好早就瞓咗