我次次拍拖都拍唔長，因為我……: 家姐篇

話咁快就番到屋企，我先開咗門，細佬幫手推啲行李入屋，之後我向細佬打咗個眼色，想佢幫手睇下老豆入咗屋後條神秘紅線有冇消失到，細佬望一望老豆條頸發現條線之後，露出一個錯愕嘅樣再向我搖搖頭，睇嚟姐係條紅線冇消失過，咁就真係奇....點解條紅線入咗結界都不受影響，正當我同細佬都沉思緊關於紅線嘅事，老豆突然開聲問「咦，阿妹，呢個嘢係咩嚟？」佢伸手指住門口道茅山符

我話「哦，冇啊，呢個係朋友幫手求嘅平安符，保出入平安，唔洗理佢㗎」我有啲心虛，因為屋企之前撞邪單嘢都係我買二手衫搞出嚟，我都唔好意思講出件事嘅真相，再者老豆都唔係好信呢啲鬼神嘢，如果畀佢知我畀咁三千銀搵師傅嚟作法，實鬧爆我所以情急講咗個大話

細佬都識做冇踢爆我，繼續扮到若無其事執緊行李，我繼續問老豆「咦，你呢排係印尼點，有冇咩頭暈身㷫唔舒服？」

老豆話「冇啦，好咗好多啦，初初去就水土不服，有時會嘔，但宜家慣咗都冇唔舒服」咁睇嚟紅線對老豆身體又冇造成啲咩影響

老豆入咗廁所後，本來沉默嘅細佬忍唔住出聲，佢細細聲咁講，「老豆入咗嚟，頸上條線都冇消失...勁古怪」我話「但佢又冇咩唔妥，冇頭暈身㷫」細佬話「不如咁啦，搵你之前介紹個茅山師傅幫手問下阿爸咩事」我話「你想搵聰哥？」佢點點頭話係





我話「我聽日番工唔得閒喎，老豆又唔信呢啲嘢，佢都唔會去...」

細佬話「我得閒啊，我可以一個人去佢鋪頭到」

我話「咁啊，好喇，你去搵師傅問下咩事，不過唔知約師傅問嘢收費幾錢」

細佬態度好積極咁話「不如我wtsapp佢問價先？」

唉，又要畀錢搞呢啲嘢，本來我唔係好信，但細佬又講到實牙實齒咁，我又驚老豆真係撞邪，算啦破財擋災





我話「好喇，問咗幾錢同我講，我畀番錢你」