我次次拍拖都拍唔長，因為我……: 阿希篇

話說我wtsapp 咗阿謙，講好咗朝早八點去探佢，其實我成晚唔係好訓得著，個腦不斷諗緊要點處理，點樣講嘢會體面啲，唔會得失隻鬼，唉，我咁大個仔第一次遇到咁嘅情況，要同鬼講數

我第日照舊同阿儀一齊出門，早餐都冇食，因為冇咩胃口，心裏面一直諗緊點樣解決呢件事，點知今日見到阿謙個情況仲嚴重咗，直頭係陷入咗昏迷，我去到病房門口見到阿謙父母喊得好犀利，伯母同我講「阿謙佢琴晚病情急轉直下，醫生話佢換肝名冊都排咗優先，但佢再係咁....可能挨唔到換肝就...」伯母哽咽到講唔到落去，我忍住眼淚拍拍伯母膊頭，叫佢振作啲，話佢咁堅強挨咗咁耐，呢次一樣會挨得過

世伯話「你可以入去睇下阿謙，不過佢宜家昏迷緊」我推開病房門，再次感受到果種寒氣，明明我今次著咗外套都感受到果種寒風刺骨嘅感覺，我入到去坐咗係病床隔離張櫈，世伯伯母都冇入嚟，可能想畀啲私人空間我哋傾偈，不過我今次傾偈嘅對象唔係阿謙，係Emma

Emma 佢訓咗係病床，好似隻樹熊咁攬住阿謙，攬到實一實，之後用存有敵意嘅眼神怒睥我，好似驚我會搶咗阿謙咁，我深呼吸咗一吓，之後開口講咗句「你好啊，Emma，我今次嚟係搵你...」我都未講完佢就即刻好大反應咁講「你果然真係睇到我，我都覺得你有古怪㗎啦，帶埋隻女鬼嚟，做咩啊？以為人多我就怕你？你估黑社會講數啊？過主喇，冇人可以阻到我同阿謙起埋一齊」

我最怕就係呢啲女，講嘢好似機關槍咁，又橫蠻無理，我完全插唔到咀無所適從，阿儀見到後幫咀話「冷靜啲，唔洗咁激動嘅，我哋都係想了解件事，睇吓有冇好啲嘅方法解決」

Emma串串咀咁講「冇喎，冇第個解決方法，佢宜家都見我唔到，同唔到我起埋一齊，只有佢都變埋鬼我先可以同佢一齊」

勁自私同幼稚囉條女