我次次拍拖都拍唔長，因為我……: 大叔篇
唉，我第一次覺得咁醜，直頭想搵窿捐
全世界人都聽到我同個𡃁仔扑野，我仲洗出嚟行嘅我哋一齊行番上樓，佢全程一粒聲都唔敢出，好似feel到頭先講錯嘢，覺得老尷，上到樓我哋開始翻查屋企啲嘢，佢係廳到搵，我番咗入房搵，我連睡床，床褥都翻過一次，大家都搵咗半個鐘，但結果咩都搵唔到，我都搵到身水身汗，出咗廳到坐
阿希話「搵均晒都冇，究竟條友會收埋啲法器係邊」
我話「鬼知咩，我搬入黎果陣間屋都包冷氣雪櫃、梳化同床架...」佢話「係喎，你個雪櫃都好似好舊下，睇嚟都用咗好多年」
我話「係掛，都唔知用咗幾耐，個冰格都唔凍，雪啤酒都唔凍」佢話「我頭先都唔夠力搬個雪櫃嚟，想你幫下手...」我話「吓，唔洗啦掛，點會收係雪櫃底啊」
佢堅持地話「快啲幫手啦，仲爭呢到冇搵過咋」我死死地氣拉開個雪櫃，因為個雪櫃應該好耐冇郁過，一搬啲塵飛晒出嚟，搞到我即刻打咗幾個乞嗤
阿希突然大叫「有啊，雪櫃個背脊痴咗張野啊！」我望過去見到一張黃色紙，上面痴滿晒灰塵，好污糟咁款，阿希小心翼翼咁撕咗張紙出嚟，拍拍上面嘅灰，之後我見到上面寫咗啲紅字，應該係符咒果類嘢，好似拍疆屍片果啲符咁，阿希問「唔通就係呢張嘢鎮住咗阿儀？」我話「唔知啊，上網查下咩嚟？」
阿希攞出電話影咗張相，好似想留啲證據咁，之後佢搵咗啲資料，同我講「呢張好似係茅山啲鎮鬼符嚟，網上話如果想銷毀嘅話，要用火燒咗佢」我攞起枱頭個火機，點著張符再扔咗落煙灰盅，我話「咁應該就ok?」阿希擰轉頭同空氣講嘢咁，話「阿儀你試下宜家穿唔穿到門出街？」
過咗幾秒，阿希話「佢出到去喇終於」