我次次拍拖都拍唔長，因為我……: 大叔篇

嘩屌那媽呢鋪真係玩大咗，話說頭先我大大聲咁講話要玩碟仙，隔籬屋啲朋友仔都聽到，好似趁墟咁，本身佢屋企都係得七隻嘢隻，點知突然間入咗一班八掛鬼入嚟，係呢個三百呎左右嘅廳，唔計我哋三條友，企咗十二三個朋友仔係到屌佢老母，真係好撚痴線，好彩阿希熄咗燈，我唔係睇得好清楚，但隱約見到有老有嫩，有個著菊花牌白底衫嘅阿伯企咗係我隔離，仲搭住我陰陰咀笑，心諗，死老野行開啦係咪想趁我玩果陣嚇鳩我啊，阿叔我嚇大架

話說阿希話「開始啦，大家伸隻手出嚟擺係碟上面喇」

我隻手擺係最上，佢家姐隻手疊咗係中間，最底係阿希，阿希話「碟仙啊，碟仙你係唔係到啊，請你出嚟啦⋯⋯」

請你老味咩，成堆嘢係隔離，開p都冇咁多人啊點解做鬼可以做到佢哋咁撚得閒啊

唔知係咪我開始覺得壓力大，手心開始出汗，佢家姐望住我冷笑咗下話「你都幾大手汗㗎喎，係咪淆底啊，唔想玩可能退出㗎」





我話「我不嬲大汗㗎啦，未驚過」死𡃁妹咁串我睇你牙刷得幾耐，一陣玩到中途就拖住你隻手，等佢見識下呢到堆朋友，嚇到佢屁滾尿流

阿希繼續講「碟仙啊，你係唔係到啊，係到就顯靈啦」

之後班仆街鬼好似前世未玩過咁，成堆圍住我哋，仲伸手試圖想推郁隻碟，聽到隔離隻廢老鬼仲好似軍師咁講「大家畀啲力推，隻碟一郁佢哋就會嚇撚親，等佢哋玩得咁過癮，最憎啲人扮大膽唔驚，仲話唔信有鬼.....」

得啦大佬，我知你哋存在㗎啦大家唔好咁痴線啦好嗎

之後隻碟畀佢哋推郁咗，佢家姐都打個突，話「仆街邊撚個玩嘢,推郁隻碟啊」阿希應該feel到係啲朋友仔玩嘢，擰擰頭話「冇....冇啊，唔係我推㗎，係佢自己郁啊」





痴線，啲鬼勁落力唔知做咩勁，我後方仲企咗個好似初中咁上下年紀嘅𡃁仔，佢伸到隻手勁出咁推，成個身都挨住我咁搞到好似人鬼情未了嘅hehe 版咁

阿希開始驚，一路震一路講「碟仙啊，想問下你係男定女啊？」心諗點答你啊，成堆有男有女