嗰一日，我將自己寫嘅故仔夾入人哋本小說度（已完）: 我的夢想

我係一個愛情故寫手。


每一日做嘅唔係研究文筆同劇情，佢哋太無聊啦，而家根本冇人會去細心留意。為咗令讀者更加享受睇我寫嘅故，作為一個勤力嘅寫手，我每日廢寢忘餐咁做嘅係──睇鹹片。

點解個世界咁唔公平？我寫姐弟亂倫嗰陣就興兄妹亂倫，寫兄妹亂倫嗰陣FBI就差唔多介入。社會節奏急速嗰陣就細水長流，個個都得閒嗰陣就轟轟烈烈。但無論點都好，今時今日想出名嘅話，加甜是常識吧？最好就用埋一睇就緊火嘅標題添。自由，平等，博愛唔係人類嘅目標咩？平等，平等，平等，個世界公平咩，公平咩？？唔講啦，睇吓睇邊套AV好先。

我係一個愛情故寫手，真正嘅愛情故寫手，如假包換，貨真價實，唔係咩大作家，睇AV只係用嚟預測講故台未來流行趨勢。作為一個大學生，一個現代社會精英，一個夢想出書嘅小薯，一個一級榮譽畢業生。。。個師妹。我寫嘅故竟然冇人睇，咁唔公平竟然出現係我身上，有無人聽過，咁唔合理嘅事，我點可以比佢發生？

六年啦，三年又三年，三年又三年，我已經為改善社會風氣，為娛樂大家而努力寫作已經有六年咁長啦。人生有幾多個六年？我都係人，我都有感情。





只係我仲未可以放棄。放棄咗，我仲會唔會係我屋企人嘅榜樣，讀者嘅朋友？放棄咗，我將會由愛情故的革新者，文壇嘅挑戰者變咗做個失敗者，我喺講故台上如何自處？

放棄真係好困難。

棄真係好困難。

真係好困難。
 
係好困難。





好困難。

困難。

難。

難在於我作為一個堅定嘅人，咩嘢都可以無，做失敗者都唔緊要，就係唔可以無咗讀者。一旦失去左佢哋嘅注意，就離石沉大海不遠了。

自從有咗讀者之後，朋友們成了一個個死在通訊錄內的數字。究竟佢哋有什麼魔力？佢哋係所有作者夢寐以求的存在，用文字描述簡直係太過膚淺。一句講晒，如果可以嘅話，我會想瘋狂同佢哋……






一齊討論點解會睇我寫嘅故。


作為一個理智人，等我用冷冰冰的數字去分析下我有幾鍾意佢哋。一個正皮，一個留名，一個推文，然後推到上熱門。


數據果然係死嘅，行動先至有效果可言。為咗圓夢，為咗娛樂大家，我每日定時定候去書店攝一張自己寫嘅故仔入其他人本小說中間，盼望終有知音人賞識我嘅才氣，將滿腔熱血印成一本書。

可惜最後只會收到警告，我就快連圖書館都冇得入。

今時今日，根本唔會有人靜下心去欣賞情情塌塌嘅文字。大家都鍾意豐乳肥臀、又或者係龍傲天，又或者係都市傳說。

我係一個成熟嘅人，自然深諳夢想不能當飯吃的道理，但最後總會因為讀者嘅一個LM而堅持下去。佢哋嘅耐性已經滿左分，佢哋係溫柔可愛嘅人，無論我寫得有幾曲折離奇，都會耐心咁睇到底；每當我又開新文，都會喺一邊靜靜咁睇住我，俾面嘅加個正皮。佢哋唔單止願意陪我一齊癲，甚至我寫到精疲力盡都會給予鼓勵。夜闌人靜，可以慰藉寂寥嘅只有AV，同寥若晨星嘅留言。我並非想怨天尤人，恨自己懷才不遇。只係作為一個有抱負嘅女人，就應該由自己做起，個故一日未改善，又點會吸引更多讀者呢？





 
革命尚未成功，同志我需努力。共勉之。

 

我係一個愛情故寫手，所希望嘅係香港文壇會熱鬧啲。