性交轉運打喪屍: （149）

我有種強烈嘅不安感，努力撐返起個人，無奈個腦迷迷糊糊，身體亦不聽叫喚，動作變得非常緩慢。

「唔知唔緊要，我示範一次你就知架啦！」。

「咳咳—」Kappa表情痛苦不堪，完全抖唔過氣。

「放手！」我好唔容易撐起身，卻又俾Alpha一下踢返落地。

「睇清楚啦！」



Alpha單手緊緊捏住Kappa條頸，另外一隻手揸住十幾吋長嘅軍刀，使出狠勁由下而上隊落去Kappa嘅心口度。

鋒利嘅刀刃直插入心，血漿如泉湧般四噴。

「哈哈哈哈哈！呢個就係背叛我嘅下場！」Alpha大聲狂笑。

Kappa從Alpha手中滑落，倒臥在地。

佢奄奄一息咁望住我，雙眼慢慢合埋，嘴巴半張半合想講嘢但卻已無法出聲，最終斷氣身亡。



「點呀？見住鐘意嘅人死喺自己面前，呢種感覺係咪好痛苦？」

我全身顫抖，極度痛苦嘅感覺幾乎令我心臟停頓。

此時此刻，心入面只有一個念頭：殺死Alpha！

「冚家剷！我要你血債血償！！！」

一股前所未有嘅力量，伴隨住無比嘅痛苦、憤怒同憎恨，喺身上爆發。



肌肉急速膨脹，頭髮脫落，指甲變長變尖，皮膚一下子變成灰黑色。

我唔知自己係咪變成左同Alpha一樣嘅怪物，淨係知道我要隊冧條冚家剷。

「啊！！！」我怒哮一聲，谷起全身肌肉，升起使出一記鉤拳。

呢拳正中對方下巴，Alpha垂直飛向上，個頭撞穿曬天花板，好似火箭咁直飛上樓頂。

悲痛以及怒火化成強大既能量，我一躍跳到上大廈最頂，再將Alpha打落樓底。

只不過，。對方亦不甘示弱，即刻還擊。

我同佢用拳頭互抽，由底打到上頂，再從樓頂打返落最底，由大廈內打到大廈外，再由外打到入內。

大家嘅拳頭將彼此嘅身體打到皮開肉綻，血漿不斷飛濺彼此嘅臉上。



Alpha一招神龍擺尾，出腳踢我個頭，我順勢捉住佢隻腳，向下拗斷佢小腿，用力踢佢落樓梯。
當想從樓梯跳起嚟個飛踢，點知唔小心俾地下啲血水冼一冼，搞到踢唔中。

諗唔到力量變到咁強，都會俾運氣作弄。

雖然踢唔中，不過唔緊要，因為我反應快，立即補多一腳。

Alpha背脊撞穿幅墻，直接飛左入去一個單位。

單位內光線昏暗，睇唔清條友去左邊，淨係隱約見到周圍似乎擺放一啲石油氣罐。

「你走唔甩啦！出嚟啦！」

突然之間，Alpha從天花板跳落嚟，一拳中我塊臉，差啲令我企唔穩跌低。



我隨即揮出一拳，同Alpha拳頭對撞，導致雙方一齊退後幾步。

Alpha拎隻錶出嚟望一望：「你都幾好嘢，磨左我咁耐，浪費我咁多時間。」

「唔洗再望錶，你今日唔旨意有命行得出呢棟大廈！」

「哈哈哈！即管睇下點！」Alpha又喺度大笑，之後就採取主動嚟攻擊。

我地再一次纏上，互相捉住對方雙手，互相喺度鬥力，就睇下邊個先拗得斷對方雙手。

就喺相持過程中，Alpha突然用個頭撼落我個鼻。

我俾佢撼到暈一暈，跟住佢用指甲「weh」爛我層皮，再「趁我病攞我命」，拗斷埋我兩隻手。



Alpha佢單手叉住我條頸，露出一副勝券在握嘅表情：「點呀？認輸未呀？」。

「呸！」我向佢吐口水，同時向上踢腿攻擊。

可惜又俾佢一嘢捉住隻腳，今次佢猶如膝頭劈木，直接將我隻腳一分為二。

「啊！！！」我發出痛不欲生嘅慘叫聲。

「好啦！係時候處決你！」

Alpha捉住我個頭，向上跳起，利用下墜嘅力量，順勢將我個頭砌落地下。

「砰！」

墜落嘅一瞬間，我個頭撞落地下，feel到頭骨已經爆開。



然之後，佢再次跳起，舉起我成個人，狠狠咁撻落去地下。

「砰！」地板完全碎裂，我漸漸失去知覺同意識，就算撼落地下都唔覺得十分痛。

「哈哈哈哈哈哈—」Alpha以勝利者嘅姿態發出大笑聲。

我感覺到眼皮越嚟越沉重 ，抖氣越嚟越辛苦，同時間見到手臂位置著火。

望真啲，手臂壓爆左一部電話，個logo牌子係咪華為？

實係我剛才撼落地下，砸中部電話，搞到入面啲鋰電池爆炸著火。

果然夠黑仔，咁都撼中部電話著火，不過呢次黑仔黑得恰到好處。

Alpha停止大笑，卒之察覺到著火，不過已經太遲啦。

啲火燃燒得好快，已經蔓延到去周圍嘅石油氣罐。

「BOOM！！！！！！」

單位大爆炸，我同Alpha無一倖免，一齊被炸死。

當爆炸時，熊熊烈焰撲向眼前嘅一刻，我便徹底失去意識。

眼前變得漆黑一片…

唔知人死左，會上天堂定係落地獄？

諗諗下，我成世人無做過咩壞事，照計唔會落地獄掛？

上到天堂唔知會唔會見得返Kappa？

眼前繼續一片漆黑，黑到盡頭，卻又出現一道光…