性交轉運打喪屍: （144）

頭先做愛嘅時候，Kappa一直有陀住我俾佢嘅轉運符，依家佢嘅運氣理應有所提升。

問題係，我以前個光頭老細講過，只有越黑仔嘅人轉運之後，運氣先會變得越強，Kappa稱唔得上一個唔好運嘅人，所以我擔心佢嘅運氣提升得唔夠。

為左驗證佢嘅運氣增強左幾多，我喺Party Room，揾左一副啤牌，叫佢五十四張牌入面抽五張牌出嚟，睇下佢抽到幾大嘅牌。

強運嘅人應該一抽就抽到同花順，結果對方只係抽到J俘虜。

佢再抽多幾次，最大都係淨係抽到俘虜，最細得一pair都有。



本來以為運氣能夠阻止Kappa消失，但係以呢種運氣嚟睇，似乎好抆水。

時間一分一秒流逝，可以俾我地考慮嘅時間已經唔多，考慮過其他嘅辦法，但似乎無一個行得通。

咁嘅情況之下，要唔俾Kappa消失，睇怕就只有同佢地一齊穿越去未來呢一個辦法。

我唔知嗰一個究竟係個點樣嘅未來，可能嗰邊嘅香港係一個面目全非、千瘡百孔嘅世界，不過其實係點都無所謂，只要Kappa無消失，而且仍然喺我身邊，咁或許已足夠。

我對Kappa講出我最後嘅決定，然後拖住佢隻手，一齊返去倉庫嗰度。



楊過同兩姊妹啃乾糧，阿得就仍然昏迷未醒，另外以Alpha為首嗰班裝甲人手腳依然被綁住，屈喺倉庫嘅一角。

「去左邊呀你地？假如諗唔到其他辦法嘅話，不如直接交『手指』俾乘哥啦！」楊過迎面走來。

「我決定左，」我一手揸住隻usb，另一手拖緊Kappa，好認真咁宣佈：「我決定聽Alpha嘅建議，跟佢地返去未來。」

「下！咩話？你咁樣咪即係置其他生還者嘅生死於不顧？點可以咁自私？」楊過反應最大，極力提出抗議，

「我知咁樣係好自私，但係…」



「唔得！隻『手指』一定要即刻交去俾乘哥！」未等我講完，楊過衝埋嚟搶我手上嘅usb。

我鬆開Kappa隻手，以極快嘅速度閃身避開：「我唔想見到Kappa消失，而呢個係無辦法之中嘅唯一辦法。」

「咪講左囉，只要叫乘哥照樣研究試管嬰兒，咁Kappa一樣唔會消失！」楊過不顧情面，居然揮拳攻擊，想打低我嚟搶走隻usb。

「邊個保證佢地一定製造到一模一樣嘅試管嬰兒？再或者如果乘哥唔肯整呢？一切變數都太大啦，我唔可以冒呢啲險。」面對對方嘅窮追猛打，我一路只係閃避，無作出還擊。

「我理解Kappa係你重要嘅人，你唔想失去佢，咁其他人呢？出面嘅人一樣有佢地至親嘅人，一樣都有唔想失去嘅人，咁嗰啲就唔係人命？你手上嘅解藥本來可以救到好多人，但你偏偏要見死不救？」

「我都唔想，但我真係唔可以俾Kappa消失！」

無左轉運符嘅我再次變得黑仔，退後閃避嘅時候，唔小心kick到地下一舊大塊石屎，成個人失平衡，向後「鄧」一「鄧」。

楊過趁機會撲埋嚟，我神經反射式伸出雙手推開佢。



一時控制唔住力量，將對方打飛到幾米遠。

楊過個頭撼落地下，成個人攤喺度暈低左。

「！」Alpha突然雙腳dum地，好大反應。

雖然佢把口塞住聽唔到佢講乜，但從佢嘅表情大概估到佢擔心楊過有事，畢竟楊過身上嘅血係製造解藥最重要嘅元素。

我確認楊過仲有呼吸，其後走到Alpha面前，拎走塞住佢把口嘅膠手襪。

「你想打死佢咩！你知唔知佢身上嘅血好重要！」Alpha一嚟就破口大罵。

我無理佢，直接就問：「時光機呢？」



「你鬆綁左我先啦！」Alpha無回答，一味叫我放左佢先。

呢個時候Kappa行埋嚟話：「我地部時光機就喺城大附近。」

「城大？咁我地咪要返去嗰頭？」

Kappa點點頭。

「係呀！咁仲等咩，快啲鬆綁左我地，就一齊去城大啦！」Alpha催促。

然而我其實對Alpha仍存有戒心，好驚條友會反口，於是想做多一手準備。

我問Kappa：「部時光機係點樣架？洗唔洗要啲特別嘅方式啟動？」

「部機要用啟動咭，先能夠啟動。」



聽完對方呢句說話，我即刻就摷勻Alpha兩邊褲袋。

儘管對方不斷掙扎，又用頭頂又想有牙咬，不過最後都係俾我揾到，一張透明塑膠製造嘅啟動咭。

我拎住張咭對Alpha講：「呢張咭由我保管，到時到左城大我先再鬆綁你！」

「仆你個街！頂你個肺！快啲放開我！」Alpha大叫。

我無理到佢，將張咭放入褲袋，帶Kappa行開。

距離下一次時光機啟動仲剩十二個鐘，趁仲有啲時間，我地諗住啃兩塊麵包再出發。