性交轉運打喪屍: （141）

楊過將usb緊緊握喺手，堅持要將佢交俾乘哥，仲話事不宜遲，想即刻啟程入深水灣揾乘哥。

Alpha就繼續遊說我地跟佢穿越到未來。

Sandy同Shirley覺得兩個選項都可以接受，至於我腦袋一片混亂，唔知聽邊個講好。

「我地將呢班人綁埋一齊之後，再整醒返阿得，跟住就去深水灣揾乘哥。」楊過對我講。

「歷史改變，人就會消失！你忍心要Kappa消失？」Alpha嘅聲音掩蓋左楊過。



我個腦越嚟越亂，分析唔到點做先係最好。

楊過開解我：「無事架，一定有辦法保住Kappa，更何況佢嘅說話都只係假設，話唔定到頭來Kappa根本唔會消失。」

「你唔聽我講，到時一定會後悔！」

「呢條友咁卑鄙，根本信唔過！」

佢兩個一人一句，隔空對罵。



與此同時，耳邊聽到一把輕輕啜泣嘅聲音。

一直都無出聲嘅Kappa眼泛淚光，攬過嚟，伏喺我嘅心口：「我…我好驚...我唔想消失...」

我拍拍背脊，安慰佢：「唔會嘅，你唔會消失嘅。」

Alpha卻煽風點火：「係呀！佢地一交隻usb出去，咁你就會即刻消失！如果你唔想消失，咁最好搶返隻usb返嚟！」

Kappa喺我懷中依偎左一陣，隨後就轉身，真係埋去搶楊過手上嘅「手指」。



生命攸關，佢使出多年習得嘅格鬥技，拳腳並用攻擊楊過。

楊過一開始只係擋同閃避，後尾發現對方原來係嚟真，於是都唔再留手，認真打過。

Kappa身手雖然了得，但畢竟面對嘅係一個大隻過佢幾倍嘅壯漢，再加上膊頭有啲傷，所以好快就俾楊過反擊。

「對唔住都要做一次架啦！」楊過擋走Kappa兩下踢腿，趁對方側身嘅時候露出破綻，即刻就出拳突擊。

我喺隔籬本來得個「睇」字，因為唔知出手幫邊一邊好，只不過依家見到Kappa有危險，第一時間用極快速嘅速度上前，出手推開楊過。

由於我身上沾染左紅眼同綠眼喪屍嘅血，得到左佢地嘅強大嘅力量同速度，所以雖然無用盡全力，但都足以將楊過成個人推開到幾米遠。

楊過連退十幾步，背脊狠狠咁撼落墻，Kappa乘機從對方手上夾硬搶走隻usb。

「哈哈哈哈哈！Kappa做得好！拎隻usb過嚟，順便嚟鬆綁我！」Alpha大笑並命令Kappa。



我則大步踏前擋喺Kappa面前：「你地部時光機唔係仲有兩日先再啟動？不如趁呢段時間，我地再諗下有無第三條路可以行？我相信實會有兩全其美、大家雙贏嘅辦法。」

Kappa停住腳步，將usb放入褲袋，跟手再喺褲袋拎出嗰隻無錶帶嘅智能錶。

望一眼之後，佢舉起隻錶展示個mon俾我睇：「只得返一日半嘅時間。」

手錶嘅熒幕上顯示嘅時間單位從「日」變成「小時」，而且時間一路倒數，只剩返36個鐘。

如果喺36個鐘之內都諗唔到其他辦法，咁隻usb一係交俾乘哥，一係就要俾Alpha。