性交轉運打喪屍: （131）

完事後，各自著返好自己啲衫。

「點解出面靜左，無曬聲氣嘅？」Shirley側耳傾聽。

的而且確，外面一啲聲都無，聽唔到嗰班人任何動靜。

Sandy個頭仲有啲「wing」，飲一啖水問我：「運就轉左，咁我地下一步點做？」

「留喺度始終唔安全，我諗都係走比較好啲。」



「真係要出去？」Shirley仍有點擔心。

「放心，依家我有強運加持，就算遇到裝甲人，應該都頂得住。」

「咁仲等咩，行啦！」Sandy率先行去門口。

我地一齊慢慢咁趟開道門，小心翼翼行出去。

走廊上空無一人，我地向住樓梯口步步前進。



大家嘅腳步都盡量放輕，殊不知行左五十米左右，嚟到樓梯口前，卻遇到我地唔想遇到嘅人。

Alpha帶住五六個裝甲人由上一層樓梯行落嚟，與我地三人狹路相逢。

「哈！咁『橋』嘅？我地又見面啦！」Alpha好得戚咁對住我地揮手。

「頂！你又話自己變到好有運嘅？點解一嚟就咁黑仔撞到班友架！」Sandy同Shirley匿喺我身後。

「無事嘅，運氣會幫我地。」我擰轉面細細聲話。



「喂？做咩唔走嘅？咁乖留喺度受死呀？」

講完，Alpha就一聲令下，旁邊嗰五個裝甲人一齊舉槍，指住我地三個。

我額頭冒汗，身後嘅兩姊妹驚到腳軟，想走都走唔到。

五把激光槍嘅槍口對住我地，眼見班裝甲人準備掹雞，就係呢個時候，地下突然喺度震動，成棟大廈喺度猛烈搖晃。

「頂！地震？」Alpha連同嗰五個裝甲人左搖右擺，完全企唔穩。

同樣地，喺強烈震動之下，我地三個亦都企唔穩。

「阿妹捉住我！」Sandy一手捉實樓梯扶手，一手捉緊Shirley。

可惜地下震得太犀利，佢地兩個失去重心，雙雙從樓梯碌左落去。



與此同時，對面有個裝甲人連槍都跌埋，仲咁啱就跌到我面前。

我當然第一時間想執起佢，不過唔記得左支槍好重，點拎都拎唔起。

對方好似飲醉酒咁，拖住飄忽嘅腳步行過嚟，想執返支槍。

呢個時候我心諗，雖然支槍舉唔起，但仍然可以照樣發射。

我單膝跪喺地下，一手撐住地面作平衡，另一隻手移動嗰隻沉重嘅激光槍，將槍口對住敵人，喺佢就嚟殺埋身嘅一瞬間，就掹雞開火。

綠色嘅激光貼住地面射出，正中敵人隻腳。

條友左腳俾射到血肉爆開，隨即成個人向前仆倒。



佢頭殼頂咁啱對正個槍口，於是我就唔客氣再開多槍。

「Boom！」

激光就咁射爆條友個頭。

「可惡！」Alpha見到手下俾我咁樣做瓜，感到深深不忿。

佢扎恆個馬，嘗試喺劇烈嘅震蕩中企穩，跟住再用槍向住我瞄準。

點知忽然一下非常劇烈嘅震動，導致佢再次企唔穩跌低，結果射歪左，射唔中我，只射中我隔離幅墻。

「Boom！」

爆炸嘅衝擊力將我彈開，我就順勢連爬帶滾碌落下一層樓梯。



Sandy同Shirley接住我，佢地頭先碌落嚟，睇嚟都無乜大礙，只係塊臉瘀左少少。

然而，目前情況雖混亂，卻係逃走嘅好時機。

我帶住兩姊妹，一趴一碌咁再落一層樓梯。

「追！同我追！」Alpha大聲命令班手下。

地震依然持續，震到天花板不停有批蕩跌落嚟。

「蕉！蕉！蕉！」

「Boom！Boom！Boom！」



兩個裝甲人喺梯間一路追住我地，且開槍掃射。

慶幸嘅係地震令佢地瞄唔準，啲激光全都射唔中我地。

之後，其中一條友突然發難，跳落樓梯撲跌左我。

佢從後用雙手箍住我，然後叫另外嗰個裝甲人瞄準。

地震似乎減弱左，我不斷掙扎，用盡力氣想掙脫，甚至仲不斷後退，借力將條友撼埋墻角，但始終都擺脫唔到。

面前嘅裝甲人已經企穩陣腳，瞄準住我個頭嚟開槍。

一道綠色激光向住我射埋嚟，唔遲唔早，頭上有一塊鏡喺正呢個時候，被震左落嚟，垂直跌下，擋正喺我前面。

塊鏡喺嗰啲平時放喺樓梯角落，用嚟俾人睇路嘅凸透鏡。

激光射到鏡面然後反彈，射左上天花板。

「Boom！」

一舊舊堅硬嘅石屎冧曬落嚟。

我不由自主咁向前仆低，見到對面個裝甲人俾石屎砸爆個頭，至於從後捉住我嘅裝甲人壓落嚟，我feel到個重量遠超於一個成年人嘅重量。

過左幾秒，我感覺到後面條友鬆開手，擰轉面望一望， 便發現條友面罩爆裂，口吐鮮血。

原來，佢都一樣俾石屎壓死左。

好彩有佢擋一擋，否則被砸死嗰個就係我。