性交轉運打喪屍: （119）

「…antidote……」

「...Dad?」

我再碌下隻錶，開其他嘢嚟睇下，嘗試尋找關於Kappa嘅個人資料，結果一無所獲，只能將兩條片又睇多次。

「喂你個鹹濕佬，企喺門口想偷睇呀？」Sandy沖完涼，第一個行出沖涼房。

佢用港女不滿時嘅典型面口睥住我，不過佢個樣生得靚，黑起面上嚟都唔算黑人憎。



之後Shirley都跟埋行出嚟，有句話係「人未到，波先到」，最適合形容Shirley，著住貼身衣物嘅，心口奇峰突出，吸引眼球。

而令我真正眼前一亮嘅，係壓軸行出嚟嘅Kappa。

佢換上左白色連身裙，頭髮放左落嚟，呢個look同我喺夢中所見到嘅，幾乎一模一樣。

我呆呆咁望住佢，有一種夢幻成真嘅感覺，令此刻嘅我心動不止。

Sandy再靚都好，Shirley再大波都好，喺呢一刻都只係灰白嘅背景板，因為Kappa奪走曬所有嘅色彩。



「我覺得…好似著褲舒服啲…」Kappa「休」起條裙，左整右整，睇落似係唔太習慣。

Sandy即刻拉返佢條裙落嚟：「女仔人家唔好亂扯條裙，好易走光架。」

Kappa聽話拉低返條裙，隨即睇見我手上拎住佢啲嘢，就問：「點解張地圖同錶面，會喺你度嘅？」

「Er…無…我見佢地喺條褲跌左出嚟，我諗住幫你塞返落去。」我將呢兩樣嘢馬上交還俾對方。

「多謝你幫我保管，呢兩嘢好緊要，唔可以唔見。」Kappa想將地圖同隻錶放落褲袋，但條裙無袋口，最後佢選擇著返條工裝褲。



咁樣著裙又著褲，其實幾怪雞，但係著喺佢身上，又莫名其妙地顯得有啲可愛。

「Er…你嗰個…Um…」

我想問佢嗰兩條片係點得返嚟，但諗諗下，一問出口咁對方就會知我偷睇過，所以講到一半又停左，接唔到落去。

「嗯？咩呀？」

「Er…都係無嘢啦…」。

Kappa雙眼碌碌，一臉純真咁問我：「你表情有啲奇怪，莫非心跳加速，又想搞嘢？」

……

此話一出，大家都靜左。



側邊嘅Sandy同Shirley更流露出驚訝嘅表情，佢地依家個心一定係諗緊，呢個外表天真嘅少女，內裡原來咁開放同直接。

「下…唔係呀…」我尷尷尬尬咁否認，下一秒又靜左。

氣氛咁尷尬，好彩呢個時候，楊過嗌食開飯：「煮好飯啦！大家快啲埋嚟開餐啦。」

成間屋就得一張長檯，已經俾阿得佔左嚟用，於是，我地只好揾紙皮鋪落地下，圍埋一齊坐低就開餐。

楊過親自落廚，仲以為佢煮會啲咩，原來就將啲罐頭餐肉、腸仔、雞蛋同公仔麵，倒埋啲公仔麵粉，就咁放曬落個煲度煮，其實就即係坊間嗰所謂嘅部隊鍋。

阿得拎筷子喺個煲撩兩撩，抱怨：「又喺得呢啲罐頭嘢，食左咁多餐，食到條脷都鈍曬！」

「自從大停電之後，基本上肉類都經已腐爛曬，出面依家就得返罐頭、乾糧之類嘅食得落口。」Shirley一邊表示無奈，一邊亦表示食到厭。



「係呀，呢個時勢仲有嘢食已經要感恩。」楊過夾條腸仔俾阿得，「嚟啦，食條腸仔啦。」

阿得即刻還返條腸過去：「真係食唔落，啲腸仔都係留俾你食啦。」

「你係唔想再捱罐頭嘅，就快啲諗下辦法，整個解藥出嚟，到時我地拎住usb同製成嘅解藥，揾乘哥交易，到時戶口隨時多左幾個零，等到香港恢復原貌之後，你想餐餐大魚大肉都得啦！」Sandy講出一個美好嘅願景。

阿得飲一啖啤酒，又開始傷春悲秋：「唉，無法同最愛嘅人分享，大魚大肉又如何？」

「得啦得啦，飲多幾罐酒，今晚帶你揾老婆。」楊過言下之意，即係又要我出賣色相。

我一聽見即刻就話：「唔係呀嘛？又嚟？」

「Shh—咪爆響口啦…」楊過細細聲聲「噓」我。

我地幾個一路喺度吱吱喳喳，就得Kappa唔出聲，搭唔到嘴。



「做咩咁靜唔出聲嘅？」Sandy問Kappa。

「我地平時食飯都係好靜唔俾出聲，見大家咁多嘢講，反而感覺有啲唔習慣。」Kappa回答。

「食飯唔俾出聲？你屋企家教好嚴架？」Shirley接住問。

「家教？」Kappa一副聽唔明嘅樣。

「即係你爸爸媽媽平時管得好嚴？」Sandy解釋。

「我無爸爸媽媽。」Kappa淡淡然回答。

原來Kappa係一個孤兒。



問到呢度，其他人就唔好意思再追問，禮貌地迴避人地一啲傷心事。