性交轉運打喪屍: （101）

「滴噠…滴噠…」

外面嘅雨已經細左好多，閃電雷聲亦都停左。

訓喺我隔籬嘅Kappa望住天花板，掩住心口：「心跳好似無頭先咁快，應該無事啦。」

「嗯...無事…係呀…大家無事就好啦…」

我嘅心跳仍然未平復，唔知係咪因為講緊一個大話，驚俾對方識穿而驚到心虛，定係因為我仲回味緊同佢嘅親吻。



Kappa起返身，著返衫褲，睇見床單上有一小撻血跡：「咦？點解有血嘅？你受傷？」

「Er…啲血應該係…係從你嗰度流落嚟…」

「嗯？無可能，我都未到生理期。」

我如實解釋：「第一次做愛，女人嗰度會流血。」

「哦~原來係咁。」Kappa一邊聽，一邊慢慢將衫褲著上。



家陣外面已經停曬雨，天色變光。

鋪頭墻上嘅掛錶顯示，現在係下晝五點。

「趁個天未黑曬，出面啲喪屍又好似走曬，不如，我地再出去，揾下嗰棟大廈？」對方比我更心急。

其實到目前為止，我都唔知點解佢一開始要跟埋嚟。

關於佢嘅身份，關於佢跟住我嘅目的，都係我腦海中嘅疑問。



然而就算我想知，都無再去問，因為知道佢唔會答。

我笠返好啲衫褲鞋襪，隨時都可以再出發。

Kappa就將放有簷蛇屍體嘅盒仔，擺置到傢私鋪一角，然後揾嚟鋪頭裝飾嘅假花，放到盒仔旁邊。

佢居然會對一條小生命咁在意，呢個有啲顛覆我對裝甲人嘅印象。

又或者Kappa同其他嘅裝甲人唔同，至少佢無濫殺人類（起碼到依家都未殺我），所以我諗佢其實係一個內心善良嘅人。

善良之外，又帶點純情，純情到好似從未被呢個世界污染一樣。

不過假如難聽啲講，都可以話係無知嘅。

「咚…咚…」



唔知係咪錯覺，地下無端端喺度震緊。

Kappa一感覺到有唔妥，就馬上衝去門口睇下。

「咚…咚…」

嗰種震感越嚟越強烈。

「咩…咩事？」我行到Kappa身邊。

「Shh—唔好出聲，我地快啲匿埋。」

Kappa講完就拖住我隻手，周圍揾下邊度有得匿埋。



我唔知發生咩事令佢咁緊張，但係佢咁樣緊緊拖住我隻手，令我嘅心跳再次加快。

「咚！咚！咚！」

呢每一下猶如打樁機一樣嘅「咚咚」聲，來自一個龐大身軀。

原來唔係地震，而係有一個接近2米高，成座山咁嘅男人正朝住門口行入嚟。

就咁離遠望，除左高之外，膊頭仲好橫，身上嘅肉漲起嚟，睇落成個奧尼爾咁大隻，而且對眼係紅色嘅。

「唔好望，我地匿入去，唔好俾隻『紅眼』發現。」

Kappa放輕聲咁同我講，同時一手將我拉入去，鋪頭角落頭一個陳列嘅衣櫃裡。