性交轉運打喪屍: （78）

上次我地喺維園執左嗰幾支槍，子彈未用曬，可以繼續用返。

由於機關槍太重，所以我淨係揀左手槍，同埋喺廚房擸左把菜刀，希望有機會陣間重演一次類似踩住西瓜皮劈冧喪屍嘅戲碼，又或者出現瞇埋眼亂射都射死喪屍嘅情節。

總之務求令Shirley對我刮目相看，從而對本人怦然心動。

落到樓下，我地四個分頭行事。

楊過喺沖涼房擸左五六個紅色膠桶，打算帶埋Jojo同Sandy搵街邊嗰啲消防喉攞水。



我就同Shirley去超市搵食物。

臨分開前，Sandy唔放心個妹，提出過不如唔好分開，四個人一齊行。

楊過就話分頭行事會比較有效率，另外佢set左個時間，約大家半個鐘後喺返樓下呢度等，確認全部人都安全先會返上樓。

「阿妹，你記得小心，有咩事唔好理，要即刻逃走。」Sandy叮囑Shirley。

「嗯，我會架啦。」Shirley點頭回答。



其實超市距離我地住嘅大廈好近，行一百米左右就到。

我特登行慢啲，等緊條街啲喪屍蒲頭。

「搞咩呀你？行得咁慢嘅？」Shirley又係唔等人，自己一個行喺前頭。

「我…我…我無食早餐，所以對腳無力，咪行得慢啲囉。」

真係奇怪，平時一街喪屍，今日成條街竟然一隻都無。



入到超市，連咁大個地方都遇唔到，心諗唔係運氣好到連喪屍都撞唔到下話？

我地兩個推住超市嘅車仔「掃貨」，旅館有廚房，因此可以拎啲凍肉返去煮。

都唔洗半個鐘，兩架車仔就入滿左。

「咁多嘢我諗應該夠架啦。」Shirley推住裝滿糧食嘅車仔，向住門口離開，「真係難得，居然會咁順利，竟然一隻喪屍都遇唔到。」

我推自己架車仔跟住佢行，心諗啲喪屍死曬去邊，全程都無驚無險，咁邊有機會俾我英雄救美？

唔得！無理由乜事都無發生，就咁返去！

「啊！差啲唔記得，漏左幫阿得攞啤酒添！不如行過隔籬街，睇下有無七仔，等我拎兩pack啤酒返去。」我求其作個理由，想拖延一下。

「唔洗啦，入返去超市拎咪得。」



「唔係呀，頭先我睇過啦，嗰度啲啤酒無曬，要去第二度揾。」

「哦，咁好啦，無記錯隔籬街街口有間OK。」Shirley加快腳步。「咁我地行快啲，拎完就走，費事遲左同家姐佢地會合。」

行多一段路，再入埋便利店，仍然係一隻喪屍都見唔到。

直至到攞埋啤酒，沿路返轉頭時，喪屍先終於出現。

「Raaauuughhh—」

三隻喪屍突然喺後面出現，當我地反應過嚟嘅時候，佢地已經埋身，準備撲過嚟。

Shirley本身想逃跑，但俾我一手捉住：「Shirley唔洗驚架！呢度有我保護你！」



三隻喪屍圍緊埋嚟，距離我地只有大約一個手位。

我擋Shirley面前，一手拖住對方，另一隻揸住菜刀，準備郁手。

點知下一秒超大聲一下「砰！」，三隻喪屍俾兩塊從天而降嘅廣告招牌砸瓜左。

我嚇到呆一呆。

唉！都未有機會俾我露兩手，喪屍咁就冧低，白白無左一個機會。

「仲望咩！走啦！」Shirley甩開我隻手，隨即推住架車仔快速向前跑。

好彩再次出現喪屍攔路。

一、二、三…十，呢次有成十隻。



機會難得，我又一次將Shirley擋在身後，擺低把刀，並攞出手槍。

憑藉運氣，應該亂射都可以射到班喪屍爆頭。

但又點估到，當我準備掹雞嗰陣，前面突然出現地陷。

前面喪屍所身處嘅馬路中央，地下竟然破裂下沉。

十隻喪屍無一倖免，統統跌曬個大咕窿度。

唔係呀嘛，洗唔洗好運成咁呀？連一個出手嘅機會都唔俾我？

我地兜路返去同楊過佢地會合，沿路都有見到喪屍，只不過未行到嚟我地度，就自己kick親仆街，對我地無構成任何威脅。



楊過同Sandy已經喺度等候。

佢地無穿無爛，成功搬左幾桶水返嚟，仲話見到我地無事，個心終於安樂曬。

唐樓無lift，我地要將啲嘢慢慢咁搬返上樓。

阿得同Isabel聽到聲，自動自覺出門口迎接我地同幫手拎嘢。

就係咁，我地成功補充物資，過程可以話係暢通無阻，非常順利。

其他人都為此感到慶幸同開心，係得我有啲失落，原因係我完全威唔到俾Shirley睇。

預想嘅英雄救美，繼而美人投懷送抱嘅情節亦無發生過。

果然，現實往往係同想象相反。

返到嚟Shirley又撩我玩大富翁，話一定要贏到我一鋪。

曾經有一刻以為，對方應該係對我有啲好感，先會係咁撩我玩，於是喺玩嘅時候，我嘗試撩佢講嘢，諗住大家交流下相互了解，結果對方根本唔理我，仲叫我唔好嘈。

好明顯佢只係唔服輸想贏我，而對我呢個人一啲興趣都無。

既然係咁嘅話，唔通我只能用大富翁嚟攻陷佢？