性交轉運打喪屍: （37）

結果上到去，就見Jason揸住高爾夫球棍，俾鬚根佬同「二撇雞」追殺。

條友一路倒後，退到走廊盡頭，背脊頂住副墻，再都退無可退。

「Unlucky救我呀！班人變左喪屍呀！」被逼到埋墻嘅Jason，打橫揸住高爾夫球棍，頂住兩個南亞仔。

「Raaauuugh！！！」

鬚根男同「二撇雞」擰轉半邊面，離遠我都見到佢地嘅眼睛、手腳同臉都變左灰白色。



哇屌！我落左去五分鐘姐，做咩就搞成咁呀？

「救我呀！Unlucky救命呀！」

Jason大聲呼救，而且好似就嚟頂唔住，要被咬到。

雖然條友平時鐘意曬命又乞人憎，但話曬都同學一場，無理由見死不救。

我快速掃視地下，揾下有無架撐啱洗。



好彩喺兩個南亞仔身後二十米處，地下有一把西瓜刀。

我二話不說，衝上前執起佢。

好死唔死，我對手殘留左啲鹼液，滑潺潺咁，一拎起，把西瓜刀就「雪」一聲飛左出去。

把刀猶如一支箭，直飛出去，插中前方一個腦袋。

我呆左幾秒，唔知點反應。



因為把西瓜刀唔係飛中兩隻喪屍，而係正中Jason個額頭。

半把刀插左入去，刀口流出鮮血。

Jason緩緩倒下，瞬間變成喪屍嘅食物。

同一時候，Isabel喺走廊另一邊跑出嚟。

佢就俾變左做喪屍嘅金毛仔追住。

Isabel邊跑邊朝住我大嗌：「仲望咩呀？唔好擋住條路，走開呀！」

我呢個時候先反應過嚟，轉身跑落樓。

「到底搞邊科，班人做咩變左喪屍？」我問Isabel。



「仲問咁多？跑啦！」

好快我地落到樓下，諗住推門出去，偏偏玻璃門嘅拉手俾繩綁住左，導致開唔到門。

「做咩道門綁住左嘅？」

「之前我驚出面喪屍入嚟，所以咪…」

「小心後面！」Isabel突然大喝一聲。

金毛仔喪屍原來已經殺到埋身。

好彩Isabel及時提醒，我先及時擋隔。



「你搞掂隻喪屍，我嚟負責開門。」Isabel開解門上打結嘅麻繩。

對方叫我搞掂隻喪屍，講就容易，我手頭上乜武器都無，就咁赤手空拳，根本煉唔贏。

隻喪屍想撲埋嚟，我只能閃避。

「喂，你快引開佢啦，唔好俾佢埋嚟！」Isabel對我講。

「我夠想啦，引得開先得架。」我掛住應佢，搞到自己分左半秒心。

喪屍就喺呢個時候，成隻牛咁撞我埋墻。

「砰」一聲，我背脊撞落墻上，痛到仆街。

然後，隻喪屍埋嚟稱起我，並捉住我膊頭。



一見佢想哄個頭埋嚟，我立即出手推隔開佢。

然而，喪屍力大無比，我出盡全力都推唔開，反而仲俾對方越逼越埋。

「喂！你解到未！我頂唔住啦！」

「得架啦！再等多陣啦！」

感覺自己就嚟招架唔住，不過眼尾睄到側邊，有個細嘅鋁製垃圾桶，令我諗起有次我扱個垃圾桶落保安頭上，最尾係成功脫逃。

於是我決定照辦煮碗，重施故技。

我後腳向後「young」幅墻，借住下肢嘅力量，順勢出力推開喪屍。



趁喪屍退後左兩三步，我就利用呢少少嘅空擋，拎起個垃圾桶，再舉起笠落對方個頭度。

下一秒，隻喪屍就訓低左，郁都唔郁。

我覺得好奇怪，個垃圾桶又唔係血滴子，隻喪屍個頭笠完落去咁就訓低左？

隨住垃圾桶下有血滲出，我踢開個桶，先發現喪屍金毛頭上插滿榴蓮殼。

哦~~我明啦~~

個垃圾桶裡面本身裝住一堆榴蓮殼，咁我一笠落去，隻喪屍就食到正一正，俾啲佈滿刺尖嘅殼插死。

哈，無啦啦又屎忽撞棍俾我搞掂一隻喪屍，真係好彩。

「Raaauuugh ......」

過左一陣，扶手電梯又傳嚟喪屍叫，睇怕樓上另外兩隻喪屍落緊嚟。

「Yes！終於解開啦！」

慶幸Isabel喺呢個時候解開麻繩。

我地推開玻璃門，成功逃出商場。