性交轉運打喪屍: （27）

我睇到呆撚左，完全唔敢相信自己中左獎，仲要係頭獎。

雖然支酒唔係我買，但係打開樽蓋，見到中頭獎嘅係我，咁計落個獎都係屬於我。

咁大個人，我從來未試過中獎，莫講話六合彩，連最易中嗰啲食雪條買一送一，都係一次都無中過。

無錯，係連一次都無中過！

但好可惜啊，家下外面笠笠亂，領獎嘅登記電話打過去都無人聽，睇嚟中左都唔會拎得到筆錢。



儘管如此，但夠我喜出望外，開心程度好比青頭仔破處。

喺呢個絕望嘅環境中，算係為我帶來一點振奮。

只係呢一點點嘅興奮止唔到口渴。

唔夠一日，兩支大啤就俾我地飲曬。

其實按照本來嘅份量，照計係可以飲夠一日，衰在娟姐忍唔到口，偷飲左唔少，所以唔夠一日就無曬。



直到呢刻，水龍頭依然無水，全屋飲得嘅嘢都已經耗盡。

我地陷入左一個乾塘嘅缺水狀態。

口腔連半點口水都無，呢種口舌乾脆嘅感覺極度難受。

然而，我地知道唔可以再坐喺度等運到，等有水嚟，再等落去只會坐以待斃。

於是經過考慮，我地決定踏出屋企，出去揾水飲。



儘管外面依然佈滿喪屍，但我地假如繼續咁落去，唔俾喪屍咬死，都會活生生口渴渴死。

反正遇到喪屍肯放手一搏，都有機會走得甩唔洗死，相反坐喺度乜都唔做，就一定會渴死。

橫死掂死，我寧願出去博一博。

我地嘅設想好簡單，就係到屋企最近嘅便利店，擸走貨架上嘅樽裝水同食物，之後原路返回屋企。

本身計劃係我單獨出去，咁娟姐又驚自己一個留喺屋企，所以決定跟埋一齊去。

原本以為糧食尚算充足，起碼可以匿喺屋企兩個禮拜都唔洗出去，無預料到只係第五日就要被逼出關。

出面咁多喪屍，梗係唔可以兩手fing fing就咁行出去，點都要做返啲準備。

屋企平日擺埋咁多雜物，到真係需要揾啲嘢傍身嘅時候，又發現無乜嘢用得著。



我地兩個左揀右揀，各自揀左啲架撐，以及做左啲防護措施。

娟姐佢擸左全屋算係最有殺傷力嘅菜刀作武器，而我就拎左螺絲批同士巴拿。

至於保護措施方面，娟姐著上厚厚嘅羽絨，條拉鏈拉到上頸，衫裡面仲攝曬一沓沓報紙，再加保鮮紙。

由於全部報紙同保鮮紙都俾對方攞曬，我就只能揾其他嘢攝。

例如係餅乾嘅包裝紙皮盒，廁紙筒、環保袋，連盒裝番簡都拎埋嚟用，不過就得一舊咁大把，我將佢攝落去一邊膊頭。

裝備完畢後，我地孭起背囊，懷住既緊張又擔憂嘅心情正式出發。

我深呼吸一口氣，先打開門木門，確認出面乜都無，先敢開埋外面道鐵閘。



老豆條屍放左喺門口幾日，早已腐爛發臭，開門第一下就聞到嗰浸腐肉嘅臭味。

我掩住口鼻，檻過老豆條屍，帶頭踏出屋企第一步，娟姐就小心翼翼咁跟隨其後。