性交轉運打喪屍: （11）

老細企返起身，無回答我嘅說話，只係發出奇怪嘅低吟。

「你…你無事呀嘛…洗唔洗call白車…送你去醫…」

說話未問完，老細突然怒哮一聲，雙手打開，十指彎曲，向住我衝埋嚟。

我大嚇一跳，慌忙後退。

對方面目猙獰，步步進逼，直接將我逼到埋墻角。



佢雙手捉住我兩邊膊頭，張開血盆大口，作勢要咬我條頸。

「冷靜啲呀老細，遲左五分鐘啫，唔洗咁下話！」

我用力嘗試推開佢，無奈條友又肥又重，點推都推唔郁，只能夠出手叉住佢條頸，盡量唔俾佢哄近個頭埋嚟。

「老細唔好咁啦，遲到啫，對唔住囉，我下次唔會啦！」

我不停叫對方停手，對方卻充耳不聞，好似撞左邪咁，完全失去理智。



「Raaauuugh！！！」

佢雙眼反白，嘴裡發出野獸般嘅低吼，而且異常大力。

我俾佢捉住膊頭，猶如俾鐵鉗鉗住咁，痛到痺，點樣掹都掹唔甩。

對方越哄越埋，個口就嚟掂到我條頸，眼見自己招架唔住，為左唔想好似今朝小巴站對面個女人咁，俾人咬到流血不止，喺咁情急之下，只能使出陰招——

踢春袋。



我毫不留情，起腳一個膝撞，正踢中佢下陰。

但係對方居然一啲反應都無。

我加多兩錢力水，當佢春袋係沙包咁踢幾多腳。

「Raaauuugh—」

對方終於有啲反應，但仍然抓住我嘅膊頭，死都唔肯放手。

我再加多幾腳，跟住佢突然稱起我，好似擲鐵餅咁，將我成個人凌空拋飛。

我被拋到去至少兩米遠，「砰」嘅一聲，個人打橫咁撞落去神壇到，當堂眼冒金星，且全身劇痛。

壇上所供奉嘅神像如保齡球樽般，全部被撞跌曬落嚟。



陶瓷製嘅神像爛成碎片，銅製嘅跌落地，發出蹡蹡聲。

我老細仍未罷休，擰轉身，朝住神壇行過嚟。

佢手手腳腳呈暗沉嘅灰白色，頭頂嗰一忽外露嘅人體大腦，依然不斷滲出血漿同腦汁。

我強忍痛楚，盡快爬起身，同時間發現手上揸住一道符，道符掕住一條銀色鏈。

頭先俾老細稱起嗰陣，我想揾啲嘢捉住，應該就係嗰刻，我掹走左佢身上條頸鏈落嚟。

平時老細將個鏈墜收埋喺衫入面，所以留意唔到個鏈墜，原來係一道符。

唔知係咪撼落個壇度，撼到眼都花，我見到道符隱約閃爍住微光。



然而，家陣並唔係研究呢樣嘢嘅時候，因為老細已經殺到埋身。

對方縱身一跳，向前撲過嚟。

我收埋條鏈，並立即閃身躲避。

避就勉強避得過，只係唔好彩，閃避嘅時候踩到地上一尊細銅像，搞到我冼低仆左喺地，鼻哥撼到爆缸。

未等我爬起身，老細嘅「魔爪」已經伸到面前，處於下風嘅我連滾帶翻，爬入平日老細幫人性交轉運嘅炮房。