性交轉運打喪屍: （9）

我返八點，依家就快七點踏八。

我快快脆脆落床換衫，再仆去廁所刷牙洗面。

「『禾』煮左『找』餐，『梨』食唔食呀？」娟姐問我。

「唔食啦，我趕時間。」我以最快速度著襪著鞋。

「『朽』公，『梨』又要出去？不如食埋『找』餐先。」



「唔洗預我，我落街食，順便買馬經。」

老豆同我同時間出門。今日係跑馬日，條友訓醒第一件事就係落街買馬經。

平時為左慳錢，多數我都係行路返工，依家時間緊逼，眼見就嚟遲到，因此決定搭小巴。

我急步行到小巴站，見到排曬長龍，條隊長到唔見尾。

其實都唔單止小巴站，沿路上我見到啲巴士站，都係一樣咁大排長龍，而且條條街都塞車，交通情況十分混亂。



「轟隆！」

天色陰陰沉沉，雷聲不斷，但無落雨。

時間已經係七點五十二分，小巴站打曬蛇餅咁，我內心十分焦躁，心諗咁等落去肯定會遲大到。

「啊！！！」

突然之間，對面街傳出刺耳嘅尖叫聲。



小巴站所有人包括我在內，目睹對面街一個發左癲嘅男人，咬落一個女人條頸到。

個女人痛到大嗌，啲血巴巴聲咁流。

大家都睇到呆左，有人拎電話出嚟拍低，而我都睇到打左個突，呆左幾秒。

不過好快我就回過神，將目光轉移到電話上所顯示嘅時間。

七點五十三分。

依家唔係關心人地嘅時候，因為時間剩返七分鐘，八點前我返唔到道堂，咁就又遲到被扣錢。

琴日揾唔到嗰道唔見左嘅轉運符，老細已經講到明扣人工，假如今日再遲到，扣埋扣埋隨時成個月份糧就無左。

搭車睇嚟已經趕唔切，睇嚟要靠雙腳跑返公司。



我抖啖大氣，然後向住公司方向全速奔跑，希望可以喺五分鐘之內趕得到。

喺跑嘅途中，我一直有留意周圍嘅狀況，我覺得今日成個土瓜灣同紅磡都好唔妥。

一嚟交通確實係非常擠塞，幾乎條條馬路都塞車，二嚟不時從遠處出現警車鳴笛聲，仲有聽到啲驚恐嘅慘叫聲。

總之成個氣氛都好詭異，令人好不安。

然而對於香港人嚟講，無論發生咩事都好，就算天塌下嚟都好，都無嘢緊要得過返工。

我穿街過巷，跑到氣來氣喘，終於返到公司樓下，時間係八點零五分，始終都係遲到。

「救命呀！救命呀！」



迎面而來有個人俾幾條友追住，並大聲求救，但返工要緊，我無理會到，快步就行入大廈。

大廈嘅閘門平日長期鎖住，今日無緣無故咁打開左，平時守住喺門口嘅保安亦不見蹤影。

半隻腳剛踏入大廈，喺門口就飄來一陣奇怪嘅鐵鏽味，再行入去就望見，地下有一撻又一撻紅色嘅液體。

呢一刻，我心入面有種不詳嘅預感。

不明來歷嘅紅色液體由門口，一路嚟到𨋢口都見到。

心慌慌嘅我加快腳步，部𨋢一到就衝入內。