美好世界的沉思者/ADVANCING (重製): |新的一章|別怕失去|

呢間時候仲係暑假，所以呢間餐廳咁多人都正常，但個種嘈雜嘅聲音令我本身煩惱嘅心情更加複雜。

我坐緊嘅呢張枱坐住7個人，除咗我仲有智偉，阿傑，威威，阿霆，娟姨同埋詩姐。

詩姐：「放心啦，佢一定會冇事嘅。」

智偉：「你嘅心情我地都好明白，我地都好唔開心。但而家我地可以做嘅就只有等。」

娟姨：「都只係過咗3日，或者聽日就會有佢消息呢。」





阿霆：「佢咁好人，一定會吉人天相嘅！」

阿傑：「吉咩人天相呀，講到佢就嚟死咁。」佢講呢句嘅時候明顯係唔想俾我聽到而壓低音量講。

威威：「我有信心！佢一定會平安無事返嚟！」

我好明白佢地所講嘅野，亦明白我而家冇野做到，但我就係非常擔心。

返去嘅路上，蹤然娟姨一路陪住我，我都係冇講過野，時不時望手機，希望下一次望嘅時候會有佢嘅消息，但每次都失望收場。





「多謝你...」我呢個時候久違地開口講野。

「你掂唔掂架？」

「嗯...放心啦。」
「你返去先啦。」

「咁...我返去喇...」
「遲啲再見啦阿雯，拜拜...」





佢一走，我嘅淚水就不自控咁流出嚟，完全止唔到。
我真係忍咗好耐。

「賢...賢...賢呀...我好掛住你...賢...」

————————————————————————————————————————

「早前一班由香港飛往瑞士嘅航班遇上空難......」我地一家食緊飯嘅時候，電視就播出有關空難嘅新聞。

「唉～佢地真係慘...」我媽媽講。

「仲有好多人咪搵得返，生死未卜。」我老豆講。

係，阿賢佢就係未搵得返，好聽啲咪仲有希望，難聽啲就係死咗都冇人知。





「有關罹難者嘅名單同失蹤者嘅名單，我地有更新...」

一聽到有更新即刻集中注意力聽，希望...唔係...

「罹難者...失蹤者...」

聽唔到有阿賢嘅名，我成個人即刻放鬆落嚟。
阿賢仲係失蹤者名單之中，仲有機會...
但心底裡有種不明嘅失落，明明係好事嚟...

————————————————————————————————————————

四年後

「咔嚓！」





「我而家去法國巴黎grad trip，好緊張又好期待！第一次出國就去咁遠嘅地方！」
「你冇兌現到承諾，又話第一次要帶我去旅行。不過你唔洗擔心，娟姨佢地有陪我去！但下次！下次你一定要帶我去！」我猶豫咗幾秒就㩒「傳送」制，連埋頭先影嘅相傳送出去。

————————————————————————————————————————

今次呢個trip我地總共去7日，成個旅行嘅行程都係由詩姐編嘅，而事實上佢都真係編得幾好，成個trip我地一行5人都玩得好開心。唔記得講，除咗詩姐同娟姨，仲有阿傑同埋智偉，至於威威同阿霆，佢地就仲讀緊書，所以就冇幸嚟玩。

當然，難得嚟到外國旅行，唔多唔少都會想享受二人世界，所以有一日我地就分開3批人去玩，我就當然係一個人。
佢地當時都有話同埋我一齊玩，話擔心我。我仲細咩，我識照顧自己架～

我早一晚已經上網睇過巴黎有咩玩，而我就揀咗呢個！

「boujour! je veux aller au musée rodin.」(你好，我想去羅丹博物館。)
呢句法文我都係尋晚臨急臨忙學返嚟。





「merci～」(多謝。)
好快就到咗博物館，我就即刻入去周圍遊覽睇展品。

————————————————————————————————————————

我睇到樣展品，有種難以言喻，又不明所以嘅感受湧上心頭。

「咔嚓！」

「我好掛住你～」今次我猶豫咗特別耐，但最後我都係冇選擇傳送出去，只係傳送咗張相。

唔知點解，我見到佢會諗起你。

沉思者雕像。手托着下巴，表情痛苦，思考住種種悲劇，內心極度壓抑同痛苦。





會唔會有一個世界，即使有種種嘅苦難，我地都可以肩並肩一齊走到永遠？

會唔會有一個世界，我地從無相遇，往後我地就唔需要經歷咁多嘅痛苦？

會唔會有一個美好世界，冇任何苦難，我地可以無風無浪白頭到老？

我好感謝有你嘅時光，個段日子我好開心。
「TOUT EST FABULEUX AVEC TOI」