美好世界的沉思者/ADVANCING (重製): 9. 自剔突破

跳唱完之後，我哋12個人都已經有啲喘氣，而台下嘅觀眾亦都傳嚟咗一浪接一浪嘅歡呼聲，掌聲此起彼落。

等老師示意之後我哋就落返台，俾下一組上去。

「得呀！入硬決賽呀！」一落到台阿雯就即刻同我講。

「係咪架？！」

「嗯！我仲拍埋片添！遲啲send返俾你睇！」





「好呀！我哋睇埋其他人嘅表演先！」

「嗯！」

跟住個4組就係表演跳舞，夾band唱歌，或者全班人連埋班主任一齊唱歌，通常呢啲就入硬決賽，可以係聖誕聯歡會個日上台表演。

而睇完呢4組，發覺原來我哋呢間學校臥虎藏龍，每個人都唔小嘢，個個都身懷絕技，忽然覺得我哋入到決賽嘅機會好渺茫。

「個個都咁勁嘅，點算呀～」





「我覺得你哋勁啲喎，又唱又跳咁，唔易架，而且Reflection隻舞我睇過都唔易跳，你哋可以跳到咁好勁架喇。」
「俾啲自信啦，如果你連自己都睇唔起自己，你嘅人生只有一個字，就係『輸』！」佢竟然用咗《點五步》入面廖啟智 智叔嘅金句。

諗返其實贏定輸都好，呢個都已經係一個人生成就，我都突破咗自己。
而且亦都令我好自豪，表演之前都冇諗過自己可以做得咁好，係好到唔只我，係其他人，老師、同學、阿雯都覺得好。

所以，呢場比賽係贏定係輸都好，係我心入面已經贏咗。

睇晒表演之後大家都各散東西各自返屋企，而我就當然係同阿雯一齊返屋企啦。





係路上，我同阿雯一齊睇返佢頭先拍我哋嘅片，因為個手機mon好細，所以我哋幾乎係面貼面咁，感受佢面部嘅溫度以及嫩滑嘅肌膚，好似剝殼雞蛋咁。

「拍成點呀？」

「專業！」
「仲要拍到我哋鬼死咁型。」我俾咗個手指公佢。

「當然啦，我勁到將你呢個人拍到男神咁，你真係要多謝我呀！」

「咁我哋去食飯啦宜家？」

「好！」
「下個禮拜六得唔得閒呀？」

「得呀！我點會有嘢做啫。」





「請你食飯吖。」

「冇啦啦做咩請我呀？」

「慶功呀！慶祝你入到決賽～」

「嘩～你對我好有信心喎！好啦，我應承你，入到嘅就被你請食飯。」

「咩入到嘅呀，係一定入！」

返到屋企之後，就收到whatsapp。

「我哋準備定決賽啦，雖然入唔入都未知，但係準備定都冇壞。」





「真呀，得佢宣布咗先再準備就少咗時間，辛苦好多。」

我send咗句收到之後就再send多條片，就係阿雯幫手拍嘅我哋表演嘅片。
順便我都send埋俾阿媽俾佢睇吓自己個仔幾型。
而阿霆都同我哋講佢收到咗好多相，每一張都係佢，我諗閒閒地都有4、50張，真係好誇張。

直到星期五放學，呢一日終於宣布究竟係邊啲人入到決賽可以係聖誕聯歡會當日上台表演。
一放學，好多人都沖咗出去睇張貼係各樓層嘅聖誕才藝表演決賽表，睇吓邊啲人入到決賽。

「得咗呀！」志偉出去睇完，好快就返返嚟班房同我哋宣布。

同一時間，我地群組上面啲人都講話得咗，個個都係度無聲歡呼。

「咁記得加倍努力練決賽喇！」阿霆即刻講。





其實我哋本身各自都單機練緊自己個部分。

「我得咗喇！」講完我就即刻同阿雯講。

「講咗你得架啦，成日都咁冇信心～」

「你講嘅力量大好多，我俾機會你講啫。」
「btw，多謝你呀。」

「我都冇做過啲咩。」

「你有呀！你一定都支持我，鼓勵我，陪係我身邊，當時仲特登整野飲俾我。仲要俾意見我，等我可以改進，做得更好，仲拍埋片...」

「得喇得喇，知喇，講到我好尷尬呀～」
「聽日食飯諗好食咩未呀？」





「係喎～唔記得添，今日同你講。」

「唔好食窮我。」

「盡量啦～」

返到去之後就即刻沖涼瞓覺，做好準備迎接聽日同阿雯出街。