我是一個學界的灰姑娘: 105. 聖誕後的開學

聖誕節，我同Ethan幾個都冇乜點去街，真係有d悶
 
我坐係房入邊溫書，果對小情侶呢?佢地就係隔離房瞓左
 
突然間，Ethan係我身後出現攬實我
 
「家琪!」
 
「嘩!」我俾佢嚇一嚇，差d成個人彈起
 




「嚇死人咩!」
 
「冇呀…見未送禮物俾妳嘛」
 
下?乜佢有諗過架?我完全冇期待過佢會送喎
 
「你會咁細心架咩」我笑笑口對住佢
 
佢拎出左一個盒放係我面前
 




「係咩黎架?」
 
「好實用架」
 
「真係?」
 
「打開黎睇下啦」
 
我雙手一打開個盒，係一隻手錶。我望實佢「點解你會送錶嘅?」
 




「因為妳冇囉，雖然唔係貴錶，不過幾襯妳」
 
錶面係粉藍色，真係幾靚
 
於是我係袋到拎出佢份禮物
 
「啦，你份聖誕加生日禮物」我唔俾佢打開，一手Q上佢條頸到
 
佢摸一摸條頸巾
 
「鍾意嗎?」
 
佢點點頭後，撲左我落床
 
「喂呀!細佬係到架!」




 
聖誕假期過後，小敏姐佢地準備考Mock，而我地課程開始趕
 
「喂，妳聖誕節去左邊呀?」Evelyn八掛咁問我
 
「我咪去左Miss Lam屋企住左一排囉，做咩事?」
 
「冇同Ethan去街咩?」
 
「最多咪落會所打羽毛球同溫書囉」
 
「又係溫書呀?有冇特別D嘅野呀?」
 
「特別呀…唔…去左校長屋企算唔算?」我托住個頭講
 




「下!?妳去左校長屋企?」
 
我點一點頭「冬至果晚去左校長屋企食飯囉」
 
「佢屋企好大架?」
 
「有車房、有花園同露台囉，大白鯊間房就好大啦」
 
「佢擺D咩係房架?」
 
「果間係佢娘家嘅房，所以…好多公仔啦…仲有雜物」
 
Evelyn對大白鯊屋企有d八掛
 
「咁校長有冇親自落廚呀?」




 
「有呀，仲超好食添」
 
「呀…好想試下呀」一講到食，Evelyn就會忍唔住口
 
「有咩食呀?」
 
「校長整鮑魚、煲左燕窩羹。Miss Lam煮薑蔥炒蟹加炒聖子、大白鯊煮蝦。仲有叉燒、燒肉、乳鴿、東星斑…」
 
「咁仲有冇其他野呀?」
 
「中藥算唔算?」諗起中藥，真係好苦
 
「妳有飲中藥咩?」
 




「有呀…Miss Lam帶左我去睇中醫，話我精神唔夠，諗起d藥都苦」
 
「有時妳真係冇咩精神喎」
 
「所以Miss Lam咪捉我去睇中醫囉」