我是一個學界的灰姑娘: 81. 好苦嘅中藥

Miss Lam煮飯的確係有一手，佢仲教我點樣煮飯煲湯
 
「家琪我教過妳煲咩湯?」
 
「青紅蘿蔔豬骨湯」最簡單嘅湯
 
「佢地幾個有冇講過最鍾意飲咩湯?」
 
「冇呀」
 




Miss Lam俾我睇眼前材料
 
冬瓜、火腿、瘦肉、冬菇、干遙柱
 
「佢地三姊弟最鍾意係飲呢隻滾湯同埋冬瓜盅」
 
「冬瓜盅?而家就快入冬啦喎」
 
「所以我咪煲中間d料俾佢地飲囉」
 




Miss Lam今晚仲煮埋薑蔥蟹之類，比起街食果d，Miss Lam d蟹係好多肉好多膏
 
點解今晚Miss Lam煮咁多?因為係星期五囉
 
之前星期五我同Ethan都係去自修室溫書，而家就改為去佢屋企溫，所以就留低食埋飯
 
不過Ethan就好少去宿舍食飯，因為媽媽話學校交通唔太方便
 
今晚有蟹，大白鯊、小白鯊同虎鯊見到都流哂口水
 




不過呢，佢地三個都好懶
 
當佢地夾左隻蟹之後，大白鯊同虎鯊望住Ethan，小白鯊望住浩翹
 
「幫我拆蟹!」x3
 
真係懶到呢……
 
Ethan望住我，因為果時我又夾到蟹鉗
 
我見到佢幫小敏姐同大白鯊拆蟹咁慘，我就幫佢拆同放係佢隻碗到
 
而小白鯊呢?佢就打開口要浩翹餵埋佢
 
Miss Lam煮野真係好好食，同媽媽有得比，所以今日我係佢廚房偷左師




 
食到一半，廚房開始傳出中藥嘅味道
 
浩翹一聞到之後，個樣立即變哂。但係Ethan同小敏姐就非常高興
 
「媽咪呀…又要飲藥呀?」浩翹個樣苦到一個點


「中藥對你氣管好呀，公公都話唔可以成日食西藥」
 
「但係真係好臭呢……」
 
只不過係類似24味果隻氣味者
 
收左檯，Miss Lam遞左碗藥出黎。黑到呢……有時我見媽咪飲中藥都係深啡色，而我眼前呢一碗係黑色




 
Ethan係到潤佢細佬「快d飲啦，苦口良藥呀」
 
浩翹用口形覆返佢「良你老味」
 
小敏姐見狀就催Ethan去洗碗
 
「喂!洗碗啦!唔好以為家琪係到就唔洗你去洗呀」
 
「家姐呀…我要睇住細佬飲藥」
 
「細佬交俾我得啦，你去洗碗」
 
然後浩翹就坐係到對住碗藥
 




「快D飲啦，一陣你又要入醫院呀」
 
「家姐呀…..唔好啦」
 
的確一如Miss Lam所講，浩翹好怕飲中藥，所以我行埋去佢身邊
 
「喂浩翹，你飲左碗藥先啦」
 
「家琪姐姐呀…碗藥真係好臭呢…」
 
「你係咪想我同慧思講…你對佢有意思?」
 
浩翹聽到我咁講，塊面好紅，而且佢仲立即走去飲哂碗藥，跟住立即扔左兩筒山楂餅入口
 
「係囉，聽下姐姐話咪好囉」




 
「真係好苦…」
 
浩翹飲完之後，廚房再次傳出中藥味道。我擰轉面同浩翹講
 
「你睇，Miss Lam都飲架」
 
「姐姐，我邊似媽咪咁大膽飲丫，不過呢劑陣味係有d唔同」
 
「點唔同?」
 
「應該冇媽咪平時飲果隻咁苦」睇黎浩翹飲中藥已經飲到一個專家程度
 
「你點解咁清楚?」
 
「飲得多自然清楚」
 
「係喎，小敏姐想做護士，你哥哥想做醫生，咁你呢?搵到目標未?」
 
「目標呀?唔…」佢講果時望住睇緊漫畫嘅慧思
 
「我同哥哥一樣都係想做醫生，我仲要做直昇機醫生」
 
估唔到呢個小朋友咁有大志