為了實現媽媽遺願，我成為了女兒國唐僧: K770

F：「你想花式踩我都唔使咁呀，唔鍾意你個仆街呀！」
我：「無呀，講笑咋，都話咗我仆街嚟㗎啦，不過你唔鍾意我就正合我意。」我一講完，隻手臂又受到貓抓式咁嘅攻擊，但小事啦，對比起天王星嘅臭腳。
同女玩…我係好鍾意嘅，但講到真愛就實在係無能為力。
我：「唔忍得都要忍，忍唔到嘅話我就唔使撈落去。」
F：「乜同我一齊…真係咁差咩？」
我：「欸…唔係咁講嘅，而係我身邊啲女神，都係我嘅朋友嚟，有一種好微妙嘅平衡，我諗我唔可以亂嚟，同埋其實妳都唔認識我啦，妳係貪玩咋？」
F：「係掛，算啦，我係唔識你嘅，咁唔鍾意你嚕。」
我：「嗯，希望…我無令妳失望啦，唔好唔開心。」
點知隔咗陣，我打好咗個table啲td佢又再開口。
F：「哎，不如你做我契哥吖。」呢個妹妹夠晒令人滴汗。




我：「吓…做乜要搵我做契哥。」雖然我答自己係上床。
F：「你話你惜我嘛，同埋你夠高大，又好打，應該可以保護到我。」妹妹妳到底乜嘢年代㗎，古惑仔都已經無再拍續集好多年喇…
我：「係鬼，一個女班長都已經夠打贏我。」
F：「應該係你讓佢咋，唔係咩？」我都唔知點形容。
我：「未至於嘅，佢係好犀利…但做妳契哥要做乜㗎？」
愛，愛，愛，因為好重要，我心裡重覆三次錯嘅答案。
F：「嗯…起碼要教我溝仔先。」
我：「吓，妳邊使人教呀，喺我心目中妳係出類拔萃㗎喇。」可惜我人已成魔高一丈。
F：「邊夠你啲女神鬥呀，剩係你都唔show我啦。」
我：「係…我錯，如果妳唔會攪破壞嘅話咪當妳契妹囉。」感覺上好似我小學生嗰陣同喺街頭識啲妹妹仔玩咁，然後約聽日喺某個位等，但好多時下個禮拜已經唔會搵返對方，反正無諗住要喺佢身上攞乜。




F：「知喇，唔同人講，唔岔禍你同女神嘅關係得未？」
我：「嗯，我都係想返學輕輕鬆鬆，唔使諗嘢啫。」
F：「OK，應承你，咁契哥加油寫網頁，我去搵下圖先。」其實妳嚟得就預咗俾妳free歪㗎啦，唔使好似要賣身咁㗎喎，我份人呢就無咁市儈嘅。
唔經唔覺，我憑一己之力都可以打晒四版簡陋嘅頁面。
F：「嗱，我save咗啲圖喺手機喇，你自己放落去啦。」
我：「吓，我用妳部電話？不如妳mail過嚟啦…」
F：「唔呀，麻煩，妳自己搞啦。」呢個女仔真係吖，點會咁輕易就俾男仔掂自己部電話㗎，有無咁懶？
既然佢話放咗啲圖，我當然就要打開佢嘅相簿嚟睇…