為了實現媽媽遺願，我成為了女兒國唐僧: K761

QQ妳點可以咁㗎？妳知唔知道做愛其實係好舒服㗎？我知道妳一定知…反而我自己已經就快唔記得。
自由…實在係太美好，過度嘅自由就會做成混亂，我哋呢兩個小朋友荒亂嘅生活就係最佳例子。到咗第二日朝早，我哋就會唔記得晒琴晚發生過啲乜嘢事，裙拉褲甩咁準備趕返學，一齊生活咗咁耐我哋都已經唔再避忌啲乜，喺個廳度快手快腳著褲戴Bra就算，佢唔會過嚟非禮我，我亦唔會專登偷睇佢。
因為…要佢主動畀我睇其實先有意義。
前後左右女神嘅交流實在係…而後面兩個班長嘅公式對話又夠晒…總之無驚無險星期一返完一日學，然後要做返啲正常中學生要做嘅嘢，就係謦project。
健：「嗱，手提電腦呀，你可以一路打住一路謦。」
我：「大佬，乜你好驚我唔做嘢咩…攞埋電腦落嚟。」
健：「無呀，方便啲啫，你打完HTML我打CSS。」
我：「send個網頁畀你有幾難呀？家陣用電話都寫到網頁喇。」以前農online game係罰坐電腦前農，而家手遊係要你廿四小時身處世界任何一個角落都要農；返工如是。
健：「咪攪，我就係驚你用電話打網頁所以先攞埋部腦落嚟，陣間啲位全部唔對亂㞗晒咪執死我？所以，就咁啦，你可以今晚攞埋返去打完第一頁聽日先畀返我。」睇嚟呢條友真係好驚我不負責任，雖然我係好想推畀佢。
我：「不如…決定咗個nav放幾多嚿嘢先啦。」




健：「先生話最少放四嚿，我諗五嚿就乜都夠。」
我：「但我哋只係諗咗三頁咋喎，剩返兩頁要做乜？」
健：「未諗到呀，你打住備用或者XXX先囉，做到先再算…或者加條link喺度去返校網同E-class都得。」
我：「你咁有誠意…會唔會唔加好過加呢？」
健：「未必嘅，阿sir咁忙邊得閒對晒，可能click完頭三版就算數呢。」每一個學生總會有呢啲多餘嘅幻想，正如每一個男仔都曾經天真咁以為女朋友check電話剩係睇對上三日，而事實上呢…你太睇少啲女一目十行嘅能力。
我：「Anyway，嗱，我打咗個head同title先。」嗯，唔錯，正如每一次中作我都好勁抽咁抄咗條題目先。
健：「嗯，你覺得h1放nav嘅上面定係下面比較好？」
如是者，我哋兩條麻甩仔坐咗喺社區中心入面謦project，我每打一句HTML佢又加口講一句咁，效率實在係可想而知，半個鐘都未打完條nav同h1，明明只係將上堂畫喺紙嘅嘢抄返過嚟…