為了實現媽媽遺願，我成為了女兒國唐僧: K559

我：「係咪好好玩？妳到底有乜居心，係咪虐待我先安樂？」自暴自棄嘅我，下面早就又搭咗個堅穩嘅帳蓬。
Q：「無玩你囉，咁樣先容易留意到你溫書嘅狀態？」
我：「吓？點解咁講，兩者有乜關係？」
Q：「因為你溫書得三個狀態，一係專心溫書，一係性幻想緊我，一係趴咗喺枱面瞓覺。」
我：「妳可唔可以唔好咁過份地瞭解我，留返啲私隱畀我好喎，再係咁我要搵條緊身底褲包住先得。」
Q：「唔好啦…焗壞雞雞唔健康呀，一齊住重講乜嘢私隱喎，我都畀你睇晒咁滯啦。」
得！我溫書，我會乖，最多唔性幻想妳…但唔知點解我每次一諗佢啲姐妹就會凝住佢喺度偷窺我哋…
星期二，QQ要去補習搵外快，然而我呢…
我：「天王星妹妹，起行未呀，妳唔郁我返歸㗎喇…」
U：「急乜鬼，有嘢畀你做呀，幫我度下幾長。」佢喺書包入面攞咗把拉尺出嚟放上枱面。


我：「呀主人…你係咁睇得起我認為我嗰度要用拉尺嚟度吖，定係侮辱緊我叫我認清自己嘅短小精幹？」我都唔知自己講緊乜嘢，身為主角無巨龍係我錯囉好無？
U：「你噏乜撚嘢呀，我叫你幫手度壁報板長度呀！」
哦，原來係咁…高度就我自己搞掂，長度就要同佢一人一邊，無計啦，做人阿四乜都要幫手。
U：「幫我睇下上面個位可唔可以加到啲類似鈎嘅嘢。」
我：「我點樣先知可以加到？都唔知妳想整乜…」
U：「算，唔記得咗你四肢發達頭腦簡單，啲複雜嘢你幫唔到手㗎喇，等我自己嚟。」佢攞咗張凳放喺度，再除鞋企埋上去，開始研究塊板上面嘅構造。
而我…就望住佢除咗皮鞋嘅腳仔，著住學生白襪，比起我見慣嘅起飛腳裸足又別有一番風味，佢對小腿又長又靚兼緊緻都唔使再多講，加埋嗰條啱啱露出膝頭嘅白裙…
我：「天王星，我可唔可以揭高妳條裙嚟研究下？」
U：「你真係唔撩架打唔安樂㗎喎，知唔知而家呢個位好適合我一嘢踢到你下腭甩骹。」
我：「唓，我呢條係問題嚟㗎，妳唔鍾意嘅話答我唔得咪算囉，知唔知呢個角度妳起飛腳實走光㗎。」


U：「用我走光嚟換你扣一半血，我點都唔係蝕嗰個呀？」我唔知佢一半點計出嚟，係咪意味住重擊我兩下下巴就可以令我一命嗚呼？
我：「女俠果然武功高強，一啲都唔暴力。」
U：「你幫唔到手就唔好騷擾我得唔得！唔係，係唔好性騷擾我，就算我唔驚你都好心唔好咁無聊。」
我：「有乜咁無聊，我只係借景抒情嚟話畀妳聽呢對腳真係好高質，好難令人唔在意。」