thriXt Qantasy 純文字安眠之作 (New: - U2K - 一直上架): K513

管：「講明先呀下，小姐妳唔可以離開呢個商場㗎，就算要去隔籬街個商場都要同我講咗先。」
V：「知喇！我會留喺呢度㗎喇，同埋你唔好跟住嚟。」
管：「咁就最好，我先無咁得閒跟住妳哋行街，阿爽同學你好好努力喇喎。」
幾經辛苦幽蘭終於爭取到兩個幾鐘嘅自由行街時間，不過之後重要隨時面對爹地嘅質問，真係辛苦晒；然之後我哋就由停車場搭（車立）上返去商場，呢種感覺又係好奇妙，以往商場啲停車場只會令我聯想起無乜人，秘道同埋偷情，就連QQ都講過會同佢條仔喺樓梯攬攬惜惜。
女人行街，的而且確係漫無目的嘅，本來以為幽蘭難得放生會開心shopping，但佢又好似無諗住使錢咁，只係拖住QQ睇下電話殼又睇下designer store，你問我呢度係咪所有嘢都貴到上天又唔係，但我睇唔到用嚿幾水買塊杯墊有乜實質意義，而且我唔係太識欣賞。
佢兩個雖然捉埋我嚟但係又無乜理過我，結果我喺個商場最偉大嘅節目就變成昅女，星期日呢度真係有好多靚女，好似放眼一望就可以搵到兩三個IG女神咁，而呢個年代啲腐敗消費越嚟越年輕化，亦帶挈我欣賞到好多同我哋年紀相約嘅妹，而唔係個個都大姐姐。
講真佢哋幾個咪又成日嚟呢度行街…我諗應該好多路人會奇怪我點解明明跟住兩個靚女但又周圍昅女，然而無人知我日日返學都俾佢哋兩個夾到實，有個重要日對夜對…或者對我嚟講佢哋嘅美貌已經唔再係重點。
咦，點解…呢個咪係，明明…於是乎我拉一拉QQ隻手。
Q：「吖，你條友，叫埋你嚟就係咁昅女，都算嘞，你重連情侶都唔放過？！」
我：「唔係呀，我認得呢個男…人，上次佢喺樂富…」


Q：「做乜呀？你識佢嘅？」
我：「唔係呀，上次我撞到佢同埋Miss Tang行街。」
Q：「你會唔會認錯人呀…乜你記得男人樣嘅咩？」
我：「九成…唔會認錯，因為佢係Miss朋友吖嘛。」
V：「你嘅結論係乜，呢個男嘅一腳踏兩船？」
我：「又唔係嘅，上次我觀察所得Miss唔係佢女朋友。」
Q：「咁你理嚟做乜唧，何況佢同而家身邊呢個女仔都無拖手，感覺上可能都係朋友嚟啫。」
V：「乜男同女可以有純友誼嘅咩？」
Q：「我同埋佢囉。」…，妳認為幽蘭會信咩…
V：「不過都有可能係同事或者舊同學嘅。」


Q：「舊愛都得㗎，呢個年代都興約EX出嚟敍舊。」