為了實現媽媽遺願，我成為了女兒國唐僧: K507

Q：「唉，個平台抽好多水，如果我嗰陣收佢一千現金就可以慳返好多，大家都有著數…」
我：「邊有得咁計，鬼叫妳嗰陣咁大方唔收佢。」
Q：「我唔想佢覺得我係個咁貪錢嘅女仔啫。」唉，其實人哋都唔知妳係邊個嚟，就算妳打劫佢都投訴無門啦…
我：「直播女唔貪錢，咁妳不如話睇嗰啲唔鹹濕，以後不如掛個牌喺度寫明免費直播，有性幻想妳嗰啲先好課。」
Q：「我想嘅咩！我真係唔係貪錢囉，只係為咗生活咋！你明明就好清楚嘅，做乜要話埋我一份喎。」
我：「好好好…唔貪錢，不過如果妳平時可以再慳啲嘅話，又的確唔使播咁多嘅…」
Q：「有乜辦法，同佢哋出街玩使好多錢㗎，唔通我開聲要求佢哋食麥當勞咩，你都明知無可能嘅，你又唔係搵得多…」唔通我先係呢個問題嘅根源嚟？
我：「其實幽蘭喺度，妳應該唔使擔心呢啲問題先係。」
Q：「如果我下下黐佢咪又係衰，同貪錢有乜分別。」
睇嚟只有用我啲錢先唔算貪錢…但講真黐住佢哋又真係好恐怖，我自己都重爭幽蘭兩千蚊，如果聽日無事無幹又去玩下先，一個月起碼要去八次先唔會蝕。




然後話咁快瞓醒就第二朝啦！只見QQ換緊校服！
我：「嘩！乜今日星期一喇咩！嘩！夠晒鐘喇！妳…」
Q：「冷靜啲啦，蠢才…我返去學校開會謦聽日就職典禮啲嘢咋，換校服只係貪方便，今日星期日嚟，你繼續瞓啦，我返學有乜可能九點幾先出門口呀？」
我：「啊呢？乜原來聽日有樣咁嘅節目呀？」
Q：「唉，你唔知都好正常，反正你只係得肉身返學個靈魂無返，而且又唔關你事嘅。」
我：「妳唔好咁話我啦，我已經勤力咗㗎喇。」
Q：「咁我出門口喇，你乖就一陣瞓醒溫下書啦。」
眼見QQ只係輕微畫咗少少眼線，都係呢個佢最靚，有種啱啱學壞卜卜脆學生妹嘅感覺，而唔係老司機。
到我再瞓醒嗰陣已經係十二點鐘…有時真係唔多明QQ啲時間點解可以咁好用，就算每日瞓六七粒鐘已經可以好精神，加埋在線嗰陣可以忙個不停，單單係做功課就可以連續兩三粒鐘。而我呢，如果你任我瞓我真係會喺張床上面扭足十粒鐘先爬起身，其實我係咪懶得滯？
書，溫一陣啦；隻Q實同佢哋食飯，我又自己煮；咬完嘢，打下機在所難免；sav個靚ve，襯佢唔喺度上網睇下有無新嘅寫真集down…屌！乜咁就三點㗎嗱？離晒大譜！我唔肯定QQ對學校有幾大貢獻，但至少一定無我咁頹廢，但我覺得已經充實過以前好多。