為了實現媽媽遺願，我成為了女兒國唐僧: K485

Q：「類近㗎咋，係無咁低B啫，衰啲咁講你以前屌緊細蚊嗰陣咪一樣以為自己好愛佢對佢好好。」
我：「對唔住囉…我知錯。」
Q：「你同我講有鬼用咩…總之，細龜咪喺度諗緊點樣可以有一個無人嘅地方畀佢同我約會囉，佢重衰到問我夠秤未，可唔可以租到酒店房，話畀返錢我。」
我：「佢係咪黐線㗎，第一次約女仔就去開房？！」
Q：「我信佢唔係諗嗰啲嘢嘅，佢只係諗點樣先可以有私人空間啫，佢咁摺應該連party room同K房都諗唔到…」
我：「妳講到呢啲好似係平價情侶偷情聖地咁。」
Q：「我就唔信你無睇過嗰啲CCTV流出呀。」
我：「嘿…嘻嘻…可能真係無呢，妳可以分享下嘅，但如果妳講到佢想借我間屋嚟同妳約會都好唔合理呀？先唔講我呢間咁嘅屋究竟有幾唔適合接待女仔，正常女仔都唔會敢上一個生保人嘅屋企呀，重要公屋單位嚟。」
Q：「你用常理去諗一個不合常理嘅人點諗嘢本身就係一個錯誤嚟…公屋單位又真係危險啲嘅，睇過三五成群嘅都會知道，而你喇喎…細蚊咪就係傻下傻下上嚟無咗個初夜囉。」雖然我唔係想表達上私人樓單位或者豪宅就會安全，但一諗到啲舊式公屋就成個恐怖feel出晒嚟。
啲乜嘢井字公屋，屯門色魔，天水圍滅門慘案…多到。




我：「唓，細蚊本身就係呢啲環境大…咁妳又敢上嚟。」
Q：「哼，英明如我有無咁水皮連你都控制唔到呀，又…當你夾硬嚟如果我反抗唔到，咪當我身體潺弱抵死囉！」哦，乜當初唔係講到上嚟同我肉償互惠交易㗎咩，做乜…
不過我想講嘅係，就算係天王星都有失手嘅時候，實在無必要咁樣同男仔膽博膽，除非妳本身就無乜所謂。
我：「唔會啦…蝦過細蚊就夠，唔想製造太多受害者。」
Q：「信你呀，唔係我長駐喺度？有無可能啲乜嘢Angel姐姐同埋韻婷已經遭逢毒手。」
我：「哎吔，我有忍住㗎，唔好咁話我啦…其實我覺得，就算要畀一個三唔識七嘅女仔入屋都好恐怖，點知佢會唔會用哥羅芳整暈我，再繼而打劫或者㨃冧我？」
Q：「唔多信你驚，睇怕係靚女你就可以開門畀佢入嚟，而且極之有可能枝哥羅芳其實係喺你手上。」
我：「…咁…我應該點樣覆條友？」
Q：「你咪問下佢想點囉，反正最後嘅決定權喺我手。」
我：「唔係呀，妳真係諗住同佢嚟個不見面的約會㗎？」




Q：「同佢約會其實無乜所謂，只要我啲嘢唔穿煲就得。」