為了實現媽媽遺願，我成為了女兒國唐僧: K470

我：「女神妳就唔好玩我啦，妳明知我咁崇拜妳…同埋妳個身體。」雖然成身散晒…但我重可以攬返住佢，用塊面感受佢溫暖濕潤柔軟嘅身體部份，噢…佢啲汗真係好香，估唔到可以零距離咁感受到。
QQ…點解妳要對我咁好，攪到我咁鍾意妳，為咗妳…邊個女仔送上門我都可以拒絕啦，雖然妳又無話唔畀。
我：「女神…好正呀，真係好鍾意…」我咁樣唔算表白掛？咦，點解我聽到啲撕開包裝嘅聲音？
我：「啊，妳做完運動肚餓要食月餅呀？」
Q：「咁月餅就梗係中秋節食㗎啦，唔通卡嚟等到重陽咩…奬勵嚟㗎，消耗完咁多卡路里可以補充返。」
我：「我重以為奬勵係女神抱抱添…」正當我想伸手攞…
Q：「喂！手手dirty呀！唔准掂！」點解妳好似當我係彼拉多咁…正當我以為佢指佢隻手乾淨啲嘅時候，佢將個月餅仔喺個包裝入面推出嚟用口咬住放喺我面前…
我唔係傻嘅，當然明佢意思，然後伸個頭埋去咬咗啖。
我：「感動呀，係流心奶王月…咦，妳做乜唔食呀？」
Q：「五唔汞勸哼嗯。」哦…唔食咁多，肯定又怕肥。




於是我又將嘴繼續伸前，嘴唇掂到呢啲就不在話下，就連牙都磨到咁滯，而剩返嗰五份一個到佢就吞咗落肚。
我：「雖然係好細個，但真係好味過大月餅好多。」
Q：「而家重邊有後生仔食蓮蓉月，都唔知蓮蓉溝沙糖溝鹹蛋有乜好食，又鹹又甜食到生痱滋。」
我：「都係嘅…但我唔明點解奶王月唔出大版囉。」
Q：「重使問嘅，物以罕為貴吖嘛，同埋如果一樣size人哋咪分唔到，點知道你食緊啲咁矜貴嘅嘢喎，佢哋買得嘅應該都係唔知邊間酒店或者pâtissier嘅出品，一個就四五十蚊，你咁樣咬一大啖就無咗餐飯，其實真係好呃錢。」
我：「嗯，由妳講出口真係好有說服力。」
然後佢開咗第二個，今次我知道要咬大啖啲，而且捉住佢個身挨埋去，一齊咬落去將個月餅仔分開做兩半，禮成嗰陣重要啜多佢一大啖。
我：「嗯啊，呢個乜嘢味嚟㗎，咁奇怪嘅。」
Q：「好似係低糖伯爵茶味，我都覺得唔好食。」
我：「攪乜鬼要出埋啲咁嘅月餅？」




Q：「好多嘢…係贏在個名㗎咋，同埋少見囉，呢啲出品擺明就係呃女人㗎啦，要健康重食乜鬼月餅喎，不如你又諗下，黑魚子醬、黑松露同埋黑毛豬叉燒邊個好食啲？」
我：「我都未食過點知喎…但頭兩樣就肯定食唔飽我，係嘞，我啱啱諗起一個問題，呢度好似係有CCTV。」
Q：「唔係好似，係肯定有，咁又點，我哋又唔係交合緊。」做乜講到好似我哋真係會交合咁…