為了實現媽媽遺願，我成為了女兒國唐僧: K468

Q：「就算佢講出口我都唔多信啦，健仔識咗人哋先一個月咪又喺度講一生一世，呢啲咁嘅說話，一係就好聽嘅大話嚟，一係就講嗰個無經過大腦，我又唔係靠佢養，又唔係無咗佢唔得，同埋我都有權搵個更加好嘅男朋友㗎嘛，係咪先，所以我都懶得驚佢偷食，就等如要驚你䚎我一樣咁無謂。」明嘅，妳會搵個更加好，人望高處，所以我就…
我：「啱嘅，好聚好散，希望你哋可以一直融洽相處…」
Q：「反而你喺度攪乜嘢呀，舉啞鈴都可以扯旗嘅？！」
我：「妳著住件咁嘅衫喺度拉胸肌…我好難做㗎喎。」
Q：「有乜特別呀，我再少布你都見過啦。」
我：「呢啲嘢…妳同我相處咗咁耐無理由唔明㗎喎，即係某啲動作同角度，先會欣賞到某種體態，如果乜都係越少布越好，啲AV就唔使套套都除衫除十分鐘啦，一開始就全裸擘大大髀唔好，而且而家重越嚟越多著住唔同服裝嚟做嘅AV，重有啲扮偷拍呀，扮走光嗰啲…」
Q：「咪好似妳啲美少女戰士特攝咁…喂，你講到咁，唔會見到Uranus著住空手道袍嗰陣都硬咗㗎！？」
死火，俾佢咁講真係心虛，除咗Zilvia之外全部都硬過晒…
我：「咁就梗係…唔會啦，佢個樣咁惡死見到都無心情硬，而且我唔想死住，如果有硬嘅跡象我會即刻夾返軟佢，再一路背元素週期表嚟對抗！」
Q：「唉，其實我覺得男仔對住佢會硬都正常嘅，只不過佢見到嘅話我真係驚佢嬲到震想一腳踢斷佢，你自己小心啲啦。」唔好以為自己真係咁清楚啲姐妹啦，佢非但無咁做…而且重俾我知道咗佢會對大哥哥發姣。




Q：「不過呢，你要罰呀！明明正正經經做緊gym係要影響我心情，嗱，過嚟架單車度！我要你廿分鐘內踩到去三百卡路里，睇你重點硬？」
我：「乜話？廿分鐘三百！一個鐘咪九百？」玩過幾次我開始有個大概，keep住正常pace十分鐘一百係唔難嘅，如果連續出兩個鐘汗就可以啱啱好抵消一碟多飯多汁嘅雜扒飯，咁你嘅實質收入就得返杯嘢飲。
Q：「而家唔係要你一個鐘，我剩係要三百啫，無多無少，你唔係諗住你嘅體能唔得呀，我都起碼二百幾啦…」
我：「得嘅，試下啦，如果多咗一卡係咪要罰？」
Q：「多咗就算啦…如果做唔到就要罰，啱啱好就有奬。」
於是乎我今次好誠實，幫自己個體重set多兩公斤…廿分鐘有千二秒，千二除三百即係四，四秒內要跳一卡。
我：「我好似…感受到…velocity…displacement…」
Q：「咪咁多廢話啦，專心做運動好唔好？」