為了實現媽媽遺願，我成為了女兒國唐僧: K465

我：「嘩，全包宴咁喎。」作為餐飲業界嘅一員，經常晚晚喺度鎅菜單對中餐菜色當然有一定認識，除咗片皮鴨同個湯之外我間酒樓都有供應嘅，唔計級數嘅話；馬叔叔講過而家酒樓做湯根本無得做，嗌嘅人無以前咁多，即整煲唔切現代人唔會等，亦預唔到個量，好多有幾種湯揀嘅中菜館其實係靠翻熱預製湯包嚟奉客，而我哋呢啲屋邨酒樓都係每日一窩例水好似胡椒豬肚湯或者花生雞腳湯咁，半賣半送，你啱飲就嗌，係正經嗌一圍菜嘅通常都送一窩…
Q：「嗯，但就無乾燒伊麪同埋炒飯，如果係你嘅話實唔夠飽。」我？又有乜可能同到妳哋五個食正經飯…私約妳同幽蘭就得，又或者私通YY天王星。
我：「咁…豐富嘅話，睇嚟又燒咗唔少錢。」
Q：「欸…一千樓下啦，好彩幽蘭想卜嘅欣圖軒點都卜唔到，去咗平少少嘅國金軒，如果唔係我破產都似。」
我：「咁不得了，百億千金都有卜唔到嘅餐廳？」
Q：「唔係咁計嘅，香港米芝蓮中菜得十幾間，夾埋晒先得幾百張枱，但香港有錢人家起碼幾千戶啦，中秋正日爆晒係好正常，我哋幾千蚊生意咋，又唔係叫佢爹地訂一圍幾萬嘅鮑翅餐，個衰妹呀…而家學咗你，日日都喺度話包起我，我就嚟失去自己㗎喇。」
我：「真係斗膽，呢個衰妹竟然同我爭女人！」
Q：「嗱，知你無玩IG，畀你睇下嘞。」
就等我過下目先，首先係天王星…大部份都係嘢食相同短片，就連切個朱古力心太軟月餅攪到好似殺人現場咁都好意思放上去嘅；YY就最多八婆相，放晒唔同姐妹嘅合照喺度；幽蘭就好開心咁攬住QQ合照，亦都有正經嘅齊人相；而Zilvia就影住手上面嘅鍊墜多謝其他姐妹，重有佢喺海旁望住月光嘅背影…當然，重有一大堆互tag嘅商場裝飾相同文化中心佈置相。
我：「幾好吖，最緊要妳哋玩得開心。」




Q：「睇完嗱？咁多靚女你好似唔心動咁嘅？」
我：「傻豬嚟嘅，最靚嘅女仔已經喺我隔籬啦。」我舉高佢隻手，無意中發現呢個角度望佢上半身真係好正。
條街唔多人，有都唔敢行近，但肯定佢哋一定覺得QQ先係今晚最靚嘅景色。
Q：「剩係識得口甜舌滑，你話你有乜用吖，肯定對住幽蘭嗰陣就讚佢最靚，上Lab堂就講我壞話，係咪？」
我：「如果我喺佢哋面前剩係讚妳，咁佢哋就會睇唔過眼㗎喇，你睇下個月亮見到妳都覺得怕醜，即刻叫塊雲嚟遮住自己，費事嫦娥姐姐見到妳嘅美貌會大受打擊。」
Q：「你都黐線㗎，佢聽到你講嘢嘔心無眼睇咋。」