為了實現媽媽遺願，我成為了女兒國唐僧: K440

點知攪攪下爛gag之際，QQ部電話就響起，係一個私人號碼嚟，都正常嘅…我係姐姐都唔會希望俾幾個中學生煩住，尤其係阿健個死仔一定會出盡九牛二虎之力纏住佢；呀，希望個電話唔係邦民姐姐，身痕姐姐，又或者入境處中聯辦打過嚟㗎啦…
欣：「嗯，唔知搵我有乜事咁呢？」一聽就知係佢把聲，帶少少輕佻嘅玩味，佢都心中有數啦，重扮。
Q：「多謝妳覆返我電話…其實呢，係關於健仔嘅嘢，想同妳溝通下咁…」
欣：「有乜好溝通，我唔諗住再理佢㗎喇喎。」
Q：「我都知妳有呢個打算，所以先嚟問下妳原因啫。」
欣：「原因，好笑，個傻仔無同妳講咩，唔係重喺度扮受害者呀？希望妳唔會俾佢呃到啦。」
Q：「佢有同我講…我都明…佢乜都唔識而且好離譜，但係佢呢幾日其實好掛住你，日日都好唔開心。」
欣：「正常吖，但我無掛住佢喎，過得一樣開心。」
Q：「我覺得…有啲嘢唔使咁絕情吖，可以再謦下嘅。」
欣：「請問有乜謂呢？明知道無將來…做乜要嘥心機？」




Q：「係…客觀嚟睇係無將來，但妳咁樣對佢…好可能會影響到佢嘅將來㗎。」
欣：「既然唔諗住理佢，佢變成點都唔關我事啦。」
Q：「咁樣好咩？妳同佢畢竟都叫開心過吖。」
欣：「喂，妳隔籬係咪有人喺度㗎？」
Q：「係，不過係得David喺度，健仔唔喺度。」
欣：「都估到，算啦，我諗佢都知…我而家有乜錯呀？佢想玩我陪佢玩，佢想親近女仔我畀佢扑埋，乜都開心晒啦，而家佢乜嘢態度對我，我唔想俾人煩住晒。」
Q：「其實…係妳想玩定係佢想玩呀？」
欣：「妳知唔知自己喺度講緊乜？睇妳個款都唔方乖得去邊，應該可以想象到佢望住我裸體個鹹濕樣㗎可？家陣唔係我迫佢瞓喺度夾硬騎上去㗎！佢想要嘅嘢我已經畀晒佢，無嘢欠佢㗎！妳呢啲女神級嘅女仔唔好同我講未玩過仔呀，禮物都肯定收唔少啦。」
Q：「我唔係扮清高，妳玩謝個花花公子我唔會理妳…但呢個傻仔其實好純，都算係好仔嚟㗎…」
欣：「係咩，如果好好，不如妳要咗佢啦，我受唔起。」




Q：「欣姐唔好講笑啦…人哋日日掛住嘅係妳，同埋其實我有男朋友㗎喇，所以無呢個可能。」
欣：「即係David其實係妳條仔嚟啦，偷偷話妳知，妳上次走咗之後佢同阿貞深情咁嘴咗啖。」嘩靠！
Q：「佢唔係我條仔…佢同其他女仔發生任何事都唔關我事，希望妳唔好誤會。」
欣：「妳咁講即係妳身邊都有大把仔喺度啦，咁有乜資格話我對阿健唔住，至少我有滿足咗佢，好過妳放到隔籬成班兵喺度畀假希望人，我無妳咁惡毒。」