為了實現媽媽遺願，我成為了女兒國唐僧: K420

我：「都係咁講啫，又無人叫妳捉我過嚟玩嘅，其實我都好驚妳，尤其係教識咗妳呢個方法之後，因為我知妳真係做得出，所以我絕對唔敢掂妳。」
U：「放心…你正正經經就得，我有能力保護自己。」
我：「妳越咁講就越係擔心，雖然妳趕走晒身邊啲仔。」
U：「做乜喎，點解個個都咁講，Queenie Yvonne又係，明明人哋就無諗住去識仔，做乜叫我小心啲。」
我：「唔知妳啦，對住IT哥哥又發晒姣咁。」
U：「無啲咁嘅事呀！我只係非常欣賞佢囉好唔好，同埋我又唔係為咗識仔而識到佢嘅…點講都好，你唔好黐咁埋就真，你先係最危險嗰個。」
我：「咁我認自己係危險嘅，不過鬼叫妳識Queenie咩，而家掂下妳都唔敢呀，如果三唔識七…可以考慮調戲下。」
U：「三唔識七我第一個打死你添呀！」
我：「妳唔捨得嘅，話晒我咁可愛…係喎，妳輸咗比我喎，肚仔呢度成大條痕，好應該要罰下。」
U：「又無話要同你比賽，測試下咋嘛…不過你想罰咩？」




我：「欸…好應該，俾我用枝筆喺妳個身上面畫下嘢。」
U：「咪畫花我塊面呀！好難洗㗎！」
我：「無人話要畫花妳塊面喎，我剩係想…喺妳個身上面加返少少危險標語，例如喺北半球寫不准亂揸。」
U：「食屎啦你！呢啲變態嘢留返同你個女神慢慢玩！」
我：「我唔敢呀，嗰個女人唔會手下留情，實打死我。」
U：「點睇都似係我會打死你多啲呀！」
我：「妳唔捨得嘅，好好玩㗎…俾我寫下啦。」
U：「No呀，你又唔係鍾意我，先唔會同你玩呢啲。」
我：「妳夠唔鍾意我咯，係要捉我嚟陪妳練功…」
U：「無㗎喇，鬼叫你輸咗比我。」




我：「是但啦，妳今日都攰喇，唔使我送妳返屋企呀？」
U：「唔使，不如…一齊食晚飯？」吓…妳約我呀？
我知我概念有啲奇怪，因為由佢捉走我嗰刻計起已經係約緊我，只不過食晚飯呢層就…
我：「飯就總要食嘅…不過…咁樣好咩？」
U：「乜你重有嘢做咩？定係嫌出街食飯貴咋？」
我：「一餐半餐無乜所謂嘅，簡單食下嘅話。」對住佢我當然唔會指望佢好似YY或者幽蘭咁包起我，但我相信佢都係喺附近解決應該唔會太貴，我最大concern其實係唔知QQ有無需要我煮嘢喂佢，但當然唔可以俾天王星知。
U：「放心啦，一定唔會貴。」
我：「你屋企人又唔同妳食？妳唔使陪細妹咩？」
U：「佢今日補完習同爸媽去阿公度，所以唔使嚕。」
我：「咁妳做乜唔過埋去？」唔係真係對我有意呀？




U：「佢哋好早就開飯，而家食緊，費事啦，下次先再去。」佢竟然又一路講一路除咗套空手道袍換返校服，入面嘅內衣顏色係…算啦；當然佢唔係對住我換嘅，而我亦都擰開少少費事望住佢。