thriXt Qantasy 純文字安眠之作 (New: - U2K - 一直上架): K409

Q：「唔同㗎嘛，直播無保證嘅，放完暑假就未必咁多人睇㗎喇，而且直播都幾嘥時間同無謂，又要用腦，邊似得坐喺度對住個小朋友教佢功課咁輕鬆，自己學到嘢又可以一路溫書。」係嘅，佢溫住數學都可以教我中英文。
我：「妳最想嘅應該係細龜消失先。」
Q：「邊有咁易，課得越多個人就會越沉迷。」
我：「惡性循環添…咁…你會幾時同要去邊度補習呀？會唔會好嘥時間，人工OK嗎？」
Q：「唔算遠，喺黃大仙現崇山，暫定每個禮拜二去一日，放學睇住佢到屋企人返嚟為止，橫掂你星期二放咗學都要同天王星去玩㗎啦。」
我：「做乜講到我必然要陪佢咁樣？」
Q：「鬼叫你輸咗喎，你咪去陪下佢囉，佢嗰度無乜師姐，又唔可以同男仔打，你去俾佢發洩下咪啱囉…我就去補習，兩個零鐘有四百蚊，呵呵。」
我：「咁又真係幾好，聽落唔會差過做直播。」
Q：「係㗎喇，所以先叫你畀心機讀書。」
我：「點同，個個家長請私補都鍾意請女仔㗎啦，男仔無乜運行…而且，嗰度好似好近妳男朋友屋企。」




Q：「都係，不過佢開咗學日日都去補習咁滯，睇下佢放學就唔就到時間囉，就到咪可以見一陣。」
我：「真係羨慕，睇嚟我星期二可以煮少餐飯都得。」
Q：「唔使羨慕喎，你都可以同天王星培養下感情。」
我：「咪攪，我怕咗佢，雖然我承認自己係幾博愛…但惹著佢嘅話實在會有性命危險，制唔過。」
Q：「未必嘅，你咁叻仔話唔定可以拗返直佢呢？」
我：「我邊係叻仔，同埋佢又唔係攣嘅使乜我幫。」
Q：「你咁肯定佢唔係？我意思係指等佢對啲仔有返興趣啫。」如果俾QQ知道佢會對住大哥哥春心動實嚇死…
我：「唔會啦，如果佢係攣嘅…係咪應該會同Zilvia一齊？而家咪幾好，由得佢兩個做乖乖女保持貞潔。」
老處女呢啲詞語實在嗌唔出口，況且佢哋都好細個啫。
Q：「唔知你啦，總之而家我又多咗少少收入，你又可以再放心啲喇，我要講嘅嘢係咁多，阿健瞓到死豬咁樣，我都過去瞌返陣先。」




補一日兩個幾鐘就四百，如果日日都搵到學生嘅話一個月就萬二，都叫勉強可以養家，唉…
同個叻女一齊生活真係唔易，都唔關佢有無錢事。
瞓瞓下，到我哋清醒返晒嘅時候已經係黃昏。
Q：「點呀，抖咗一日，覺得自己可以放低未？」
健：「如果放得低…琴晚早就放低咗啦。」