thriXt Qantasy 純文字安眠之作 (New: - U2K - 一直上架): K392

呢個時候幽蘭都換好運動服，係一個黑色sport Bra加淺藍色嘅full cover背心，下身就係黑色yoga pant，論性感程度雖不及QQ，但係佢嗰種自然散發嘅貴氣實在好懾人，兩個妹一齊係度玩部…唔知乜鬼䟴䟴機，睇住個屁股同大髀搖來搖去…唔得，我要專心做運動，如果唔係會哽返落自己度。
四千蚊就可以同兩個天花板女神做gym，抵過晒買任何遊戲機啦…雖則我已經同佢哋嘅肉體有過多親密嘅互動，但有時都要抽離下先得，作為一個一窮二白嘅小朋友可以同佢哋咁樣相處已經係天大嘅福氣，我前世一定過得好慘，而阿健前世應該俾人切咗JJ做公公…
可能由於未放工嘅關係，個場唔係太多人，而管家先生就著住件貼身白T走去自由練習區度玩，即係打沙包，舉啞鈴，拉筋咁；佢嘅body實在係非常強壯，完全唔配合佢呢個近乎退休嘅年紀，身上面嘅肌肉並唔係啲死操爛操一嚿嚿嗰種，而係修長結實又充滿彈性，驟眼睇落去同一個軍人無乜分別，甚至係特種部隊；你話得閒同暴力女認真打下我都覺OK嘅，但我絕對唔敢挑戰呢個一米八幾嘅大叔，難怪幽蘭話喺管家身邊就會覺得超安全。
雖然佢無打攪過我哋，但我都唔敢同佢兩個行得太埋。
V：「做乜自己一個喺度玩唔理我哋呀？」
我：「無呀…我想…玩到…777…卡路里…先停。」
Q：「細路仔，你當呢部係老虎機呀？」
V：「呀，我想玩老虎機呀，好想快啲到廿一歲生日就可以去澳門。」唔通佢想做敗家女？
我：「喺電話玩…咪得…」
V：「點同喎，App game全部都係呃錢，唔會贏到真錢返嚟嘅。」小姐…妳確認賭場嗰啲老虎機並唔係呃錢？我諗重呃過夾公仔機呀！不過妳應該勸咗細龜同學先…




Q：「妳打橋牌咁叻唔係應該去玩poker咩？」
V：「可以嘅，但為咗對付啲職業賭徒，而家啲例改晒無得同莊公平對拆，就算你記得晒啲牌兼用埋計數機都唔會有得贏，就連我阿爺都無再去玩。」屋邨妹就玩換衫game，富家女就研究賭場技術，呢啲就係人嘅分野…
Q：「低B仔，776喇…」點解我凝住佢喺度鬧我柒轆…
我：「嗯…我衝線喇！」跳錶去到777卡！
777卡係一個乜概念？大概就係一個縮水M記餐配zero；正當我望住粒數字喺度自豪嘅同時，我聽到部單車機繼續喺度轉緊，大約過咗五秒之後…
Q：「好明顯你真係未玩過…跌咗落山喇。」
V：「睇嚟去賭場嘅話係唔可以帶埋佢去。」
望住778呢個數字我感到十分無奈，而我已經全身濕透。
Q：「去玩下其他啦，最多我教你玩。」
於是我就喺佢兩個嘅指導下，學習一啲佢哋由細對到大嘅器具，呢啲本來就係佢哋生活嘅一部份嚟。




而唔經唔覺時間已經嚟到七點鐘。