為了實現媽媽遺願，我成為了女兒國唐僧: K390

你知啦，最憎幫QQ摺底底，最好收完我直接幫佢笠。
QQ無換到底褲，上面笠咗條灰色yoga pant就同我一齊出門口，可以預計今晚佢條底會香到出汁…
唉，點解我咁淫…明明我係真心鍾意佢嘅。
Q：「呀，你行出去先，過廿秒無問題我就出嚟。」
睇嚟佢都重記得唔可以同我太過親密；過咗陣我哋行到去泊車位，幽蘭架專屬Alphard已經泊咗喺度等緊我哋。
V：「你兩個上車先啦，好快就到㗎喇。」
幽蘭坐司機位隔籬，我哋就坐老細位，唔係幾好意思添…
Q：「妳叫我哋換好衫，但係自己就重著住校服嘅？」
V：「傻豬嚟嘅，我架車上面有衫畀我換㗎嘛，就連校服都有多一套喺度呀。」啲富家女真係吖…
五分鐘多啲我哋就已經到達咗目的地落車，管家先生就要繼續佢嘅泊位工作。




Q：「我哋就係嚟呢度？」係一間gym room門口。
V：「係呀，等等呀下。」
而家啲現代gym room已經唔似得以前咁可以霸住大商場鋪位，門口成揸型男索女喺度兜客，一大排落地玻璃等你睇到入面啲白老鼠喺度跑步；好多已經移師返去舊區租啲一二樓樓上鋪，改為七廿四無人管理營業以配合時代嘅變遷。佢門口有個嘟卡認樣嘅裝置，不過幽蘭無卡就要㩒鐘嗌人，等咗陣就有個姐姐行落嚟帶我哋上去。
Q：「妳帶我哋嚟係諗住點樣？」
V：「咁都要問嘅，梗係一齊嚟玩啦。」
Q：「我知係嚟玩…但問題係點玩法？」
V：「可以點玩？入會咪有得玩囉。」
Q：「妳都知…啲會費對而家嘅我嚟講唔算平…」
V：「傻瓜嚟嘅，帶得妳嚟就梗係唔會預要妳出錢啦，妳啱啱生日無幾耐嘛，當係禮物送畀妳啦。」
Q：「點得喎，到妳生日嗰陣我無嘢送返畀妳…」




啲女神們嘅生日遊戲，永遠都係咁麻煩又商業掛帥。
V：「妳成世都咁惜我，對我嚟講就係最好嘅生日禮物。」救命…好肉麻呀，真係超級百合聽到我毛管戙。
Q：「傻瓜，妳係我第一個好姐妹，惜妳係一定㗎。」
我：「咳咳…拜託妳兩個唔好急住喺度桃園結義先，問題係捉埋我嚟想點，登記一日免費試玩咋？」
V：「唔得喎，你要同我哋一齊入會。」
我：「唔好咁對我啦，啲會費對我嚟講好大負擔㗎，我又無理由要妳請埋我嘅…」
V：「唔使你出，學生優惠買二送一，你負責要咗送一嗰份就得。」