為了實現媽媽遺願，我成為了女兒國唐僧: K386

我發現佢cap咗好多QQ嘅直播片落嚟，重剪走晒啲對話框，務求令佢變成QQ嘅乃木坂音樂MV；入面嘅QQ著住白色運動短袖外套，粉紅色露腰吊帶背心，白色百摺超短裙蹺腳坐介乎露底同走光之間…即係其實已經露咗少少粉紅色底底出嚟。又…其實對我嚟講算得啲乜？
我唔肯定細龜會唔會睇住嚟J，但以我對佢嘅見解嚟推敲，佢一係就覺得神聖不可侵犯而唔J，一係就覺得要每晚插香拜神咁日J一次以表效忠…
我：「真係好正，睇到人流晒口水呀。」
龜：「夠喇，唔好褻瀆我女神，所以咪話囉，你身邊嗰堆女仔根本就無得比。」
我唔係好明佢個邏輯係邊，就算以正統女神嚟計，QQ同幽蘭兩個已經係天花板咁滯，只不過平時返學唔會有機會著得咁爆啫；然而，佢好似唔記得咗嗰幾隻嘢除咗暴力女之外其他全部都係樂器高手，欸…幽蘭就應該未知嘅。
我：「既然識到賞識嘅女仔，點解重悶悶不樂咁？」
龜：「本來上個禮拜約咗佢出嚟見面㗎，點知佢臨時有事嚟唔到…」講咗咁耐終於到重點喇！真係救鬼命！
我：「會唔會係佢玩你呀，網絡上好多嘢都信唔過㗎。」
龜：「有乜必要，又唔係我迫佢出嚟…同埋佢好似嗰日真係有事，之後佢有同我道歉㗎，重一直有謦欬，之不過嗰次之後，都再約唔到佢出嚟。」
我：「會唔會係其實佢唔想見你？」




龜：「可能係嘅，佢從來都唔出樣，同我講好驚見面之後，佢喺我心入面嘅印象會壞滅，又話覺得而家咁樣其實係最健康，問我除咗見面重有無其他嘢想要。」
我：「咁如果佢直播唔出樣，可能真係好驚俾人見到。」
龜：「我鍾意佢又唔係因為佢靚女，我係真心支持佢㗎，無論佢係咪靚女都想親身話佢知我嘅心意…其實佢暑假嗰陣搞過一次粉絲見面會㗎，可惜我喺台灣去唔到，諗起就嬲，都唔知台灣有乜好去，不過聽其他粉絲講佢嗰日都係戴咗副大黑超，所以無人可以完整睇到佢個樣。」
好彩你唔喺度，如果唔係對QQ嚟講實在係噩夢，隨時要為咗你一個人取消成晚嘅活動，蝕都蝕死佢；又好彩我嗰日坐喺角落頭匿埋，沙織直播嗰陣應該影唔到我。
我：「咁睇嚟佢好有性格，普通女主播梗係同你見面之後，再借啲意叫你課多啲，點會倒自己米呢？」
龜：「佢調返轉㗎，話覺得好對我唔住，叫我唔好課金畀佢先，其實佢會唔會唔鍾意我，但我乜都無做過…」
我：「唔會掛…我覺得佢係唔想露樣啫，搵個麻包袋笠住佢個頭咪得囉，就當佢係一條魚頭人身嘅美人魚，我OK喎，妳selling point係乜我咪要乜！」
龜：「你黐線㗎，都唔知你身邊啲女仔點解會理你。」
我：「因為…我諗…佢哋都黐黐地線掛。」
龜：「咁講又係。」




然後我哋繼續完成埋碗車仔麪，呢個問題確實係無解。