為了實現媽媽遺願，我成為了女兒國唐僧: K379

U：「唔係呀，啱啱相反…佢比較內向成日都唔多講嘢，就算佢哋間唔中嚟玩阿妹都係一個人匿喺間房入面，所以咪唔多熟囉，最慘嘅係佢成績都麻麻哋，所以入唔到我哋學校，佢去咗間好普通嘅中學…我無得睇住佢，好驚佢比人蝦，又擔心佢哋啲先生唔識教書，都唔知點算好。」
我：「好內向…唔會係有病吖嘛？」
U：「小一嗰陣同佢睇過醫生，做過測驗話智力同溝通都無大問題，可能係有少少鈍，同埋主要性格因素咁。」
我：「唔出奇嘅，就好似細龜都唔多講嘢，但其實佢好正常，有自己嘅興趣，而且都過得幾開心。」
U：「佢係怪人嚟啫！同埋人哋讀到書點同喎，佢重考得好過你呢條大懶蟲！」
我：「呀！係喇！幽蘭佢屋企識得學校啲高層㗎！如果搵佢幫手嘅話會唔會…」
U：「咁樣真係好咩？我都唔知…如果單單為咗好學校轉去啲二線直資讀都唔係唔得，我哋唔係無諗過㗎，但嗰度啲氣氛未必一定好，阿妹又話無問題，所以就唔搞咁多嘢喇，太過理佢反而驚影響到佢心情…總之，我一定會做好自己，無論發生乜嘢事都要照顧到佢。」
我：「有無諗過可能係妳太強勢，令到佢覺得無癮？」
U：「會咩？我哋又無迫佢…呀！落車喇！」
土瓜灣並唔係啲乜有錢人嘅區域，但呢度私樓多，我覺得就算揸住個唐樓單位都叻仔過住公屋好多㗎喇，除非你係住呢度啲劏房啦；而當然天王星佢一落車就知佢係住啲比較好嘅地方啦，應該話呢區嘅最好，就係翔龍灣。




不過對得QY兩件嘢多，就會諗埋，係邊座先？高層定低層？座向？呎數？供晒未㗎？等等…
我：「使鬼迫咩，妳咁耀眼，係人見到妳都怕咗妳…妳問下有無男仔敢同妳打，係我先會自掘墳墓。」
U：「你終於知你唔識死喇咩！不過，你都真係有返咁上下先會咁同我講嘅。」
我：「可能對得Queenie多個人會比較肆無忌憚…雖然，我知咁樣講好唔現實，但我覺得…如果可以嘅話，妳溫柔少少，隨和少少，都不失為一件美事嚟，妳睇下吖，明明男班長第一日對妳都興致勃勃，但而家已經怕咗妳。」
U：「唔需要，佢唔敢黐埋嚟就最好，我對佢零興趣。」
QQ講得啱，天王星佢真係好硬頸。
U：「喂…你想點？」我用空出嚟嘅右手搭住佢膊頭。
我：「我想講，對唔住，其實妳暴唔暴力都唔係一個問題嚟，我唔應該話妳嘅，無論點，妳喺我眼中都係一個非常優秀嘅女仔，我實在十分敬佩妳。」
U：「做乜…無端端同我講呢啲…」然而我一句佢就面紅。
我：「因為…我知道如果下世見到妳一定會愛上妳。」




我將著住校服嘅佢一攬入懷，不過佢實在太高，個頭只可以晾喺我嘅膊頭上面。
U：「喂…死仔包咪揩油喎…打…seven…你㗎…」