thriXt Qantasy 純文字安眠之作 (New: - U2K - 一直上架): K375

然後佢就開始嗌飯，不外乎都係蕃茄炒蛋，西芹雞絲，薯仔排骨…其實我屋企附近都有三餸飯賣而且同QQ認真研究過；平？唔算太平，一盒都挨住四十；健康？好難講，就算蔬菜多但油鹽味精都多；抵？其實椰菜蘿蔔薯仔呢啲係完全唔值錢，而且肉餅魚塊呢啲一定粉多過肉；衛生？見仁見智啦，都要睇彩數嘅…
最後得出嘅結論係，用會員價買盒一哥焗豬，返到屋企再自己煮菜會更高性價比，而貪靚嘅QQ真係肯食白烚椰菜，連滴蠔油都唔使落…夠晒極端。
天王星買咗兩盒三餸飯再加一條黃花魚，一百蚊有找。
U：「你唔係自己住咩？可以順便買埋㗎。」
我：「唔使喇…自己煮飯會更加慳錢…」
「靚仔益你嘞，既然追緊人就實係你搦㗎喇。」
是但啦，反正我又唔係住呢附近，妳想點就點啦。
我：「唉，距離地鐵站又遠咗嘞…」呢度係土瓜灣同紅磡嘅中間，正常唔係住呢頭嘅小朋友都唔會熟路。
U：「乜地鐵站呀，你重要送我返屋企㗎。」
我已經無意志去反駁佢，就咁俾佢拖住去到個巴士站。




我：「估唔到妳都幾貼地㗎喎…作為一個富有人家竟然會食平民三餸飯同埋搭巴士返屋企。」
U：「咁由細食到大有感情吖嘛，有魚有肉有菜又方便，呢度幾架巴士都去到我樓下，重簡單過截的士啦…我細個嗰陣都係住呢附近啲舊樓咋，就算係用而家嚟比，喺你個普通朋友前面根本就唔係嘢，同幽蘭比嘅話就更加係草根階層嚟添，所以…唔好諗咁多，最緊要自己夠努力。」
我：「好彩我只係個公屋仔…乜都唔使比，哈哈…」
U：「點解你做人可以咁唔上進？點追女神呀？」
我：「妳認為…呢啲環境嘅嘢，真係靠努力就可以改變到㗎喇咩？唔通大學畢業就會發到達？而且我無話過要追女神囉…更加多嘅係欣賞，可以同到妳哋做朋友一齊玩我已經覺得好滿足。」正當我諗住佢駁唔到我嘅時候…
U：「努力唔一定成功，但如果你放䠋就注定失敗，你係咪甘心成世都係咁吖，你付出過，嘗試過，就算最後得唔到你想要嘅結果，你都一定會有得著，絕對唔會後悔，我爸媽細個嗰陣都唔係有錢人嚟，一個住公屋，一個租唐樓，最大鑊係佢哋讀書都唔係叻，嗰陣本地學位無咁多，兩個考完A level之後都係半天吊，輾轉去咗澳洲讀書，去到之後先發覺原來使費好大，唯有同其他人合租，甚至住過喺車房同農場，放學同放假就去農場打工摘生果，去餐廳洗碗送外賣，媽咪甚至做過按摩…成績普通嘅佢哋揀唔到啲乜煞食學位，一個讀食品生產管理，一個讀餐飲，佢哋就喺大學互相認識，畢咗業之後唔係白人喺嗰邊好難搵工，返到香港亦唔見得呢啲學位有幾馨香，唯有去啲食品大代理度做低級職員，佢哋喺入面發覺到香港呢啲公司以至餐廳都係食水好深而且黑箱作業，全部為利是圖唔尊重食物亦都唔尊重消費者，而且一啲都唔專業，所以就毅然離職靠少少積蓄同屋企人嘅幫助自立門戶，初初真係捱咗好耐先成事，而且啱啱有咗我就連返工都要孭埋我咁滯，咁多年嚟都唔係一帆風順，幾年前差啲由賺錢變蝕錢，全靠破釜沉舟轉做電子營商先可以起死回生咋，如果唔係佢哋又要執笠返返去打工…」