為了實現媽媽遺願，我成為了女兒國唐僧: K353

我：「喂，點解又係我㗎…」
U：「你知道做人阿四係乜意思㗎可？」
我望一望男班長，佢即刻將隻眼望去左上角，話我知乜都唔關佢事，佢都控制唔到…都唔知佢兩個點分工嘅…
我：「大佬，又社費，又班會費，邊係班長職務嚟？」
U：「大佬，班入面係無社代表呢樣嘢㗎，收完一樣係交畀班主任再分發各社負責老師，唔係班長收咁邊個收呀？至於班會職務，Kevin都一早指名要你幫手，所以你一次過收咪啱啱好囉，你聽日重要收中文課後咪啱晒，鬼叫你係班主任科科長。」
我望一望肥豬佢攤大雙手，話我知佢早已屈服喺淫威下。
我：「話時話，妳自己咪係…準社長嚟囉。」
U：「咁咪啱囉，你而家係做我阿四呀，唔係我班長職務嘅阿四呀，你再投訴信唔信我要你跨社嚟幫我做嘢呀？」
我：「得啦，我收就係…希望聽日前收得齊啦。」
U：「小心啲呀，加加埋埋三千幾蚊，如果唔跟身就記住鎖locker，有乜嘢意外係你自己負責返㗎咋！」




使你講咩，我以前做盡壞事點會唔知錢銀危險，妳估locker好安全呀？十個密碼鎖我破到七個，就算解唔到都可以扑走條門鉸芯嚟開門，我不如袋喺銀包算，除非係妳用暴力嚟打劫我啦，如果唔係應該都幾安全。
收錢永遠都係一件苦差，一定難過收功課而且個個都黑面，好在大部份同學體諒在我嘅苦況份上都肯盡早交畀我，呢班又唔算多窮撚，所以兩個小息已經收咗廿幾張紅衫魚…點解我今年咁鬼忙…
到咗放飯已經精神渙散兼餓到肚扁，第一時間就捉咗阿健去食飯；唔好諗住我同班女熟就會有得同佢哋食，一嚟會俾人講，二嚟貴，三嚟我已經怕咗天王星唔想再見到佢，容乜易一陣叫我餵埋落佢口度…正一廢人食廢人餐。
不過我知佢絕對唔係廢人而且重好能幹，如果佢叫我幫手解決下佢啲性需要嘅話…都重係要慎重考慮，從長計議…
今日健仔個樣重係神神化化，掛住微笑又唔多講嘢。
我：「想問下你知唔知，阿康韻婷兩個係咪friend咗？」
健：「啊，乜嘢吖嘛…佢兩個開學嗰陣又係唔知同邊個坐好，於是見到之前同班同學咪坐埋一齊囉，然後先生又無大兜亂繼續一齊坐，咁咪friend咗。」
我：「幾好吖，終於有得同女坐，值得恭喜。」
健：「唔抵得？後悔蘇州過後？係你之前唔show人哋…」
我：「講乜鬼呢啲吖…你又唔係唔知我乜嘢景，做朋友咪算囉，如果佢兩個謦得埋都戥佢哋開心。」




健：「上個禮拜搵咗佢一次咋，佢都話有啲曖昧咁。」