thriXt Qantasy 純文字安眠之作 (New: - U2K - 一直上架): K346

要知道，我哋一邊手仍然係十指緊扣，另一隻手亦互相捉住，所以佢係用成個上半身嚟壓住我，至於佢膝頭有無掂地已經唔係重點，因為我而家十足十一個俾佢制服然後等佢強姦我嘅小男孩咁，無論點睇我都已經徹底咁輸咗。
明顯地呢個係摔角嘅姿勢嚟，我願意接受跟住落嚟佢對我嘅蹂躪，例如對我條屍嚟多次十字碎心口。
U：「乜…投降呀！輸…你就輸啦！」玩咗咁耐…其實都係十分鐘唔夠，我同佢已經氣來氣喘，完全咁感受到佢個胸係我心口上面嘅起伏。
或者你可以幻想一下我哋啱啱大戰完而佢將啲唔要嘅嘢射晒入我度，就差唔多可以準確咁描寫到我哋嘅動作，體位，同埋面容，可惜嘅係我哋塊面錯開咗。
易：「廢柴，實在令人失望！」
U：「講乜呀？！佢輸咗，你覺得你好馨香咩？而家係佢丟晒你哋啲男仔架咋！定係你想出嚟幫佢報仇呀？我唔介意嚟多場㗎！」佢…到底有幾睇唔起異性生物？
易：「Sor呀…女班長…」
U：「食完花生啦？無戲睇喇！唔關事嘅人麻煩走先。」
天王星亦都好有體育精神咁拉返我起身，因為我隻左手重係一直無同佢放開，正確嚟講係摙得太耐痺咗唔識鬆…
U：「喂，男班長你重留喺度做乜呀？」




慕：「身為班長，我只係想盡責確保班上面任何一位同學嘅人身安全，無乜特別。」
U：「你放心啦，我都係班長，佢嘅安全由我嚟確保就得。」
慕：「咁星期一再見喇，咁多位，bye！」
終於趕走晒啲無謂人，剩返五個女神喺度，而佢哋都由得阿健喺度睇住我，無所謂啦，橫掂全世界都已經知道我輸咗，無乜所謂會唔會更加樣衰嘅問題。
我：「Uranus對唔住，之前係我口出狂言，妳嘅技術實在令人佩服，我收返晒所有講過嘅嘢。」我對住佢九十度鞠躬，是但啦…對住暴力我都無得唔屈服。
我指嘅係佢嘅精神暴力呀！佢根本就想全世界男仔臣服喺佢手上先安樂，唔可以有人叻過佢嗰隻。
U：「你唔係諗住一句道歉就可以算呀？」
我：「其實你都無乜損失啫，都叫做喺全世界面前教訓咗我，又贏得好好睇睇…我都想講得出唔介意俾妳打一身呢啲說話呀，但妳要知道，憑妳實力嘅話，我硬食妳一拳分分鐘入院㗎喇。」
U：「放心，我先唔係暴力女，唔會無聊到想打你，Queenie，妳唔介意我攞妳隻兵嚟用下吖嘛？」
Q：「乜…我隻兵喎，我同佢唔係好熟㗎咋，妳鍾意點罰佢隨便得㗎喇，我係唔會幫佢呢啲亂講嘢嘅人。」




YY隨即嘴角摵起，而幽蘭就用力㩒實個嘴。
先唔計我同呢度啲女神嘅奇怪關係，客觀嚟講我喺佢哋面前只係一隻螞蟻，完全無反抗嘅可能性。
U：「呢一年…得返幾個月啫，今年完之前你就做我阿四嚟贖罪啦。」
我：「天王星姐姐，可唔可以…明確講下我要做啲乜？」
U：「問得好，首先就…每日幫我處理借鎖匙開課室門同鎖課室門，重有負責朝早同飯後嘅點名工作。」
乜話？！咁同要我做埋班長有乜撚嘢分別？