為了實現媽媽遺願，我成為了女兒國唐僧: K336

V：「有乜可能…你覺得去補習社除咗溫書重有乜做？」
我：「嗯…可以識下啲外校人，如果啱韾咪可以做朋友囉，放咗學重可以一齊玩，食晚飯咁，如果好彩嘅話可能重可以溝到女或者仔，Queenie男朋友就係學吹笛識返嚟…」
V：「咁咪係囉，你見我屋企部琴重靚過出面都知乜事啦…補習社，band 1嘅又會去band 3嘅又會去，我屋企人又點會冒險俾我去補習社吖，全部都係上門嚟教我。」
我：「但上門…好似請唔到出面啲天王級名師喎。」
V：「出面好多睇片㗎咋…我而家有三個補習先生，一個係退咗休嘅正式老師，有廿幾年中學名校教師經驗，亦都做過十年嗰啲天王，另一個係會考8A高考5A，中大first hon直至到PhD畢業做埋研究員，重有一個最後生早兩年先考完DSE攞咗十三粒星而家係Kong U，專幫我拆解當前嘅考試制度。」
我：「想問下係咪全部都係女嚟？」
V：「咁又唔係，全部都係仔…可能因為男人講嘢有條理啲同埋宏觀啲，同埋會易deal過啲女人。」
我：「佢哋個個都咁叻，咪應該好貴？」
V：「係㗎，最平咪個Kong U傻仔，佢嗰陣聽到五百蚊粒鐘話上嚟試堂睇下點先，結果上咗嚟之後就無走過。」
我：「有得同靚女補習，錢已經唔係最重要。」




V：「或者啦，佢最初好似都對我有啲興趣，不過…你都知呢個係無可能嘅事，佢亂掂下我隨時夠佢前途盡毀，不過佢住得近囉，又一居咋嘛，而家嘅佢話過嚟補習好舒服，有點心有雪糕食，同埋似係想拉下關係咁。」
我：「明嘅…咁嘅話妳屋企人對妳嘅成績實好高期望。」
V：「哈，你話呢？我諗基本要求係要我有五六粒星先當我合格掛，如果我攞唔到呢個數，唔好話佢哋，就連我自己都唔知點面對自己…」
我：「係嘅，妳有咁好嘅資源…真係辛苦晒妳，不過妳都唔好太緊張喇，始終身體健康最重要呀，知唔知？」
V：「富人係會有富人病…我叫過Queenie不如嚟同我一齊補習㗎，加少少錢就得，不過佢唔肯。」
我：「呢方面…我諗我唔值得嘥錢嚟陪妳上堂…」
V：「你？算吧啦！我同Queenie教你重好過。」
講真，佢唔係串我，一啲好表面嘅嘢任誰都可以睇到條鴻溝清清楚楚攤咗喺度，但喺心靈上佢係視我為平等嘅一個人，所以先會咁樣同我講嘢。
我：「欸…我會勤力啲㗎喇。」
V：「咁就梗㗎啦，我管家到咗喇，行先聽日見！」