為了實現媽媽遺願，我成為了女兒國唐僧: K329

我：「原來做仔就可以同屋企反面，做女唔得…但係如果反咗面嘅話妳重可唔可以留喺度呀，小心俾人掃出門…」
V：「哼，我知道我發脾氣嘅話佢哋最後一定心軟嘅，好喇，唔好再講咁多廢話，要繼續落去錄音喇。」
我：「我想問…可唔可以換第二篇或者第二段呀，呢段稿真係好heavy呀，要我對住妳講我會心痛。」
V：「點解呀，茶花女係一個好淒美嘅故事嚟㗎。」
我：「我都知嘅…但我又未睇過，剩係覺得喺度鬧緊妳，可唔可以搵啲開開心心嘅片段呀。」
V：「大部份傳統文學都係用憂傷嚟做主軸㗎啦。」
我：「或者係嘅，所以我真心唔明呢啲催淚嘢有乜咁好睇，我諗我停留咗喺睇蠟筆小新笑餐死嘅程度。」
V：「對我嚟講…呢啲係我嘅鹹書嚟㗎喇。」
我：「有無咁嚴重呀…」
V：「你試下無卡通睇，無漫畫睇，就連網都唔可以亂咁上吖，呢啲書就係我最重要嘅精神食糧嚟㗎喇。」




我：「無咁嚴重呀…至少妳而家落去開電視咪播緊卡通。」
V：「係呀，然後梳化都未坐暖就會有人打嚟問我做乜睇咁耐電視，咁不如唔好睇啦，就連我間房長期閂門都會有人問長問短…」
我：「唔係呀化，連房入面都有CCTV？點換衫呀？」
V：「房入面無，但走廊有呢，影到我門口書枱嗰個位，咁我最安全就梗係坐定定睇書㗎啦，茶花女嘅中英文版我已經睇過各兩次喇，就嚟要攞法文原版嚟睇。」
我：「好…我認同…做富家女真係幾慘下。」
V：「使乜講，唔好諗住有錢就乜都買到，至少我買唔到你呢個傻瓜嚟日日陪我玩，所以我好羨慕Queenie，我就係啱啱又聽到佢嘅遭遇先又睇多次茶花女咋。」
我：「係？唔通佢會好似小說個女主咁做埋啲賤格嘢？」
V：「唉，你真係吖…我簡短同你講下啦，呢個故事係真人真事改編㗎，講述一個十五歲出身草根嘅女仔，佢好想進入上流社會過優質嘅生活，可幸上天賜咗佢花容月貌同一把好靚嘅嗓音，於是佢就開始咗巴黎嘅歌伎賣唱生活，咁單單賣唱就未至於豐衣足食嘅，所以你都明，佢由十六歲開始就不停咁黐埋去啲有錢男人度做人情婦，雖然作者寫得好含蓄，但賣唱背後會發生乜事就唔使畫到出腸嘅，所以我先話會當鹹書咁睇…」
我：「嗱嗱嗱，妳好朋友唔係我情婦嚟㗎…我充其量都只係支援佢一日三餐同有覺好瞓，雖然佢有暗示過可以用某啲嘢補償返我，但我哋一直都以禮相待。」認真咁講，我哋一齊生活我從來無主導過佢任何嘢，最多只係好似小情人咁互動…所以呢個故仔應該留返畀佢媽咪至啱。