為了實現媽媽遺願，我成為了女兒國唐僧: K327

V：「咁第一次吖嘛，梗係感覺重要啲㗎啦，唔通，哦，你係好男仔，交畀你，然後無感覺，完左，咁樣呀？咁不如搵個一百%嘅好男仔，同佢簽約，嫁畀佢要佢成世照顧我咪算囉，但可能就咁成世都未享受過愛情㗎喇喎，真係OK？況且都唔肯定到佢係咪真係成世照顧自己㗎，如果佢係咁好，又對我好，我都唔鍾意佢咁其實佢有幾好噃，都唔合邏輯嘅。」小姐妳知唔知世上有好多平平無奇但都幾好嘅男仔會收幾多好人卡，可能只係佢哋唔明女人…
我：「但壞男人好可能只係一刻溫柔無結果㗎喎，過一排就會厭倦咗然後對妳唔好。」
V：「呢個世界上邊有咁多結果吖，所有人嘅結果都係死路一條㗎咋，你睇下我屋企檔生意由我太爺開始創業，經過兩代人努力到而家我爹地咪又係繼續做到趴喺度，結果咪就係個雪櫃而家有好多我無乜興趣食而你又唔好意思食嘅雪糕喺度囉，如果一個壞男仔氹得掂我鍾意佢，我明知佢唔太好都摏個頭埋去咪抵我死囉，但起碼嗰一刻開心先吖嘛，當益咗佢囉，到佢對我唔好嗰陣自然就會踢佢走㗎啦。」或者如我所講太有錢嘅人的確對使錢無乜興趣。
佢同QQ都係好叻嘅女仔，呢啲問題我亦同QQ討論過；QQ比起佢就更加狠，佢話一個人點都有好嘅地方同壞嘅地方，好壞唔係重點，而係睇你點同佢相處嚟產生價值，對自己嚟講真正嘅壞係對方絕對生產唔到價值甚至係負價值，對住好人你可以諗辦法最有效益咁利用佢，而對住衰人亦可以喺保護到自己嘅前提下諗下有乜好玩。
佢重用食嚟做比喻，就好似佢會食生果又會飲zero咁，明知zero要錢無營養無乜益佢都會繼續飲，因為爽吖嘛，所以兩者係無衝突…然後講講下佢又會燒埋我，話我肯養佢咁好人一定會食窮我，然後到我望住佢身體扯旗嗰陣好鬼衰，就可以諗辦法玩到我精盡人亡，我點都係輸。
V：「嚟吖，我帶你睇下天台周圍呀。」我哋沿住泳池側邊行，只要留意下就會發現呢度係一個承高咗嘅area，而側邊呢，一邊係一條好窄嘅走廊，另一邊就係啲冷氣機房，水箱嗰啲嘢，重有好多太陽能板同射落街嘅CCTV，全部嘢都係我以前認為唔會出現喺一間屋企嘅嘢。
至少，係唔應該要個住客理呢啲嘢。
我：「其實望落去啲水都唔係好污糟啫。」
V：「睇你同乜嘢比啦，但既然可以變返乾淨，我就唔會掂而家啲水。」
我：「下次換水有需要可以叫埋我嚟清潔㗎。」




V：「好呀，我唔介意多個工人俾我用㗎。」
我：「其實要游標準池嘅話，睇嚟有錢人都無乜選擇。」