thriXt Qantasy 純文字安眠之作 (New: - U2K - 一直上架): K318

係三條腐皮卷，四隻餃，兩條牛肉串燒，煎到金黃酥脆同焗到肉汁泌出，聞到已經香噴噴，絕對唔係偷懶是但蒸甚至乎係叮出嚟嘅貨色，唔肚餓都攪到肚餓。
經後門出到去原來重有條樓梯，類似學校禮堂側門落操場嗰啲石梯，絕對唔係工廠大廈啲中空鐵梯或者垂直爬上去嗰啲，抱歉我實在係打得太多機。
上咗兩層理論上呢度就係天台？但眼前有一間好似玻璃屋咁嘅嘢，同打機啲豪宅有得揮，幽蘭又係用手指開門；呢度空間唔算太大感覺係一間活動室嚟，對邊有牆同鋼門，而實際上呢度都放咗啲golf桿，迷你球道，幅牆重貼咗減速棉；而且呢度樓底幾高入面重有條鋼梯。
我：「喺度打golf唔驚爆玻璃咩？」
V：「無人叫你專登打落去，同埋係防彈玻璃嚟。」
佢講完就開始行條鋼梯，上到去有道玻璃門通去玻璃屋出面，今次係終於無鎖嘅，出到去我大概明白佢天台嘅結構，其實玻璃屋係天台嘅一部份，牆後面係泳池嚟，由於要有高度放水就變到好似多咗一層咁，呢度有鋼架同帆布拉起嘅遮陰位，側邊擺咗麻雀枱同燒烤爐重有枱凳，出面有太陽遮同曬太陽凳，最過份係重有一個凸上嚟嘅按摩浴池…我唔想咁形容，因為泳池係凹入去而呢嚿嘢係露出嚟，都幾大下，應該可以舒服咁坐到四個我喺入面。
媽呀，好複雜呀，實在亂到爆，喺度做管家實辛苦死。
泳池係長條形，估計係四米乘三十米左右。
V：「做乜呆咗咁呀，食嘢先啦。」
叫我點唔呆，我成世人都無諗過會嚟到呢啲地方。




我：「嘩，好好味呀！呢隻乜嘢餃嚟㗎？」
V：「呢隻我諗係金濠嘅帶子餃嚟，最重要係Florence佢嘅手勢。」
我：「欸…我諗我未聽過呢個牌子。」
V：「佢其實係榮鈦行嘅高級Brand嚟，主打新鮮手工點心，咁你應該聽過掛，好多牌子都係咁，例如平嗰間叫大家樂，貴嗰間就叫意粉屋。」咁我就聽過，因為QQ見到佢啲散貨特價粟米餅同糯米雞就會買返嚟叫我整畀佢食，本身已經唔差，面前呢幾粒更加係靚酒樓級數。
我：「咁我知喇，意粉屋我咁大個仔都係食過一次咋。」爹地屎忽痕帶我去食set lunch，感覺無乜特別，最多好坐少少，因為佢都唔算係太貴。
V：「呢個就應該係蝦卷，都係金濠嘅，串沙嗲如果我無理解錯係星加坡造，唔記得牌子嚕，全部都係靚嘢嚟，如果你食得開心就最好。」