為了實現媽媽遺願，我成為了女兒國唐僧: K315

之後就嚟到飯廳連廚房，講多無謂，呢度size都等於我嘅兩間屋有多，有一個外國紀錄片好常見嘅U型開放式廚房，對開係一張好大嘅長方形飯枱，另外又有一張圓枱，唔通要跟返中西餐揀返張啱嘅枱嚟食？實在難明…
呢度實在係應有盡有，窗台前面種咗幾盤嘢其中一盤係辣椒嚟，雪櫃隔嚟就有個酒櫃，重有部Bonaqua上流飲水機，以枝裝水嚟講呢個叫好飲啲㗎喇…望望下重見到廚房係有佢自己嘅專屬廁所。
V：「果汁啱唔啱？」佢打開咗部三菱N門雪櫃右上嘅門，門口下面嗰兩層膠兜全部都係果汁嚟，唔止…層架底層都重有，我重望到啲類似香檳嘅嘢，牛扒…
我：「嘩，小姐妳屋企開果汁鋪？重要Bless嚟…」
V：「咁有得揀，都係買啲靚㗎啦，屋企人想我營養好啲就長期訂貨，每兩個禮拜就會有幾十枝送過嚟。」
我：「如果我無理解錯妳屋企都係三個人，飲得晒咩？」
V：「飲唔晒㗎，所以就好似你見到嘅咁，呢度stock咗成四五十枝，就算開party都清唔晒。」
我：「會唔會過期㗎，好似好浪費。」一枝細嘅Bless要成廿幾到四十蚊都有，我都唔知要等幾耐先間唔中見到百佳有啲就到期嘅美國橙汁飲，十八蚊有兩lit。
V：「無咁易嘅，cold press嘅放到一兩個月，同埋有時候塞得太多管家同Florence就會攞嚟飲。」可唔可以話我知點先可以有得喺有錢人屋企打工，老細重要咁靚女？
我：「如果唔訂貨，自己去買唔係可以買少啲咩？」




V：「好煩㗎嘛，嘢飲好重，想搬死Florence咩，同埋原廠訂咁多都有一定折購嘅，啱你就攞啦…」
我：「雖然果汁健康，但其實都好多糖份。」
V：「係呀，所以我剩係飲甘筍同西柚汁多…如果你唔鍾意嘅話其實可以飲返水，或者等Florence返嚟叫佢幫你沖茶或者咖啡都得。」
我：「唔使，咁我飲橙汁啦，使唔使幫妳攞埋？」
V：「今朝先飲咗一枝…你都係幫我攞枝Perrier啦。」
我唔肯定有錢人係咪會使錢使到厭，但起碼對住呢啲所謂嘅高級食物已經唔會有任何心動嘅感覺。
我：「你個雪櫃…就好似一間迷你citysuper咁。」
V：「你睇埋下面呢格先，唔好咁快下定論住…」
有好多日本同韓國嘅雪條，MOVENPICK雪糕，日本急凍蛋糕同其他叮叮即食食物。
我：「如果Queenie睇到實開心死都似。」