為了實現媽媽遺願，我成為了女兒國唐僧: K312

望到盡就變返做一層樓底，但都重係好高，有一排落地玻璃不過用窗簾半掩，遮住左邊放咗部好鬼大部嘅黑色三角琴喺度，而佢嘅右邊係咪叫客廳？有一個大空間放咗set L型梳化，有部我諗七十幾吋嘅電視，一堆音響同座地喇叭，誇張嘅號角喇叭形狀係類似一朵橙色嘅鬱金香，望落好似同我一樣咁高…
V：「你望到呆晒咁做乜？」
我：「咁大個喇叭，音色係咪會好美好？」
V：「望住唔開心，幾美好都無乜用㗎咋。」
我：「但係點解要唔開心喎？」
V：「你寧願對住部無得打機嘅大電視，定係揸住部乜game都有嘅電話？」
我：「咁…我明嘅，想問下部三角琴點運入嚟㗎？」
V：「拆咗排落地玻璃囉，我都唔係好記得…」
我：「重有…你哋唔係啱啱返嚟咋咩，冷氣唔使開嘅？」
V：「佢哋出去一陣啫，通常都唔會熄㗎喇。」




我：「咁樣會唔會好嘥電？」
V：「呢個問題…一開一熄其實都嘥電㗎，本身已經有智能環保分區恒溫，set咗廿二度，同埋天台有太陽能板…」
我：「要整咁多嘢咪會好複雜？」
V：「係，咁有興趣，係咪想嚟做我屋企管家？」
我：「邊敢呀，我何德何能喎…」
V：「算你有自知之明，等十八歲考到車牌先再諗啦。」
我：「咁妳個管家先生咪好犀利？」
V：「佢係好犀利，除咗車牌重有船牌，有水電牌，識簡單汽車修理，對裝修有研究，重係潛水攀石遠足健身嘅教練，而且識多種武術係一個合格嘅保鑣。」
我：「萬能管家嚟？咁佢其實唔使做管家都得…」
V：「傻瓜嚟嘅，佢當然係因為有合理回報同埋返工返得開心先會服務咗我哋家族幾十年啦，以前阿爺返大陸謦生意，七八十年代嗰陣上面治安重係好差，喺馬路中心都可以被攔車截劫，所以一定要請保鑣，到後嚟公司上咗軌道好多嘢已經唔使親身落手做，咁我又未出世，管家有好多時間進修同埋研究自己有興趣嘅嘢所以咪乜都識啲囉，而家佢兩個仔都喺我哋集團度做緊，叫做唔使搲爛塊面喺出面搵工，唔使俾人刻薄無咁易俾人炒，既然係咁嘅話，就算識幾多嘢都唔會轉工啦，係咪先？」




佢一路講一路帶咗我去客廳嘅斜對角位置，即係玄關位右邊牆後嘅空間，其實都屬於客廳？呢度有一張應該坐到六至八個人嘅長方形圓角木枱，上面放咗個無插花嘅花樽，側邊有幾張都幾靚下嘅辦公室椅，有頭枕手枕腰墊嗰啲，絕對唔會差過啲得個樣嘅電競椅，拍牆有張L型嘅工作枱，上面有兩部電腦同一啲文儀用品，睇落一部係PC另一部就係MAC，估計係攞嚟謦生意用。