為了實現媽媽遺願，我成為了女兒國唐僧: K309

我：「少少嘈啫，應該未至於會冚到我哋把聲嘅。」
V：「但…我管家已經嚟咗附近接我放學喇喎。」
我：「吓？！即係妳原本就諗住…」
V：「係呀，梗係舒舒服服坐喺屋企度做㗎啦。」
我：「即係…我要去妳屋企？」我已經無言了。
V：「有乜問題？你係我嘅好同學嚟。」究竟…佢係咪讀女校讀到有啲認知障礙，知唔知一個女仔單獨邀請一個男同學去自己屋企係乜嘢意思？雖然主題係功課…
我：「咪住，去妳屋企做功課都唔係最大問題，如果我喺正學校門口上妳㗎車嘅話實會俾人講到…」再難聽嘅嘢我都可以想像到，例如幽蘭強搶QQ隻兵，又或者QQ玩厭咗我外判出去，甚至乎兩個富家女共用性奴抽乾我…
V：「一早知你啦，我哋行去錶位度上車好未？」
咁都好啲，但重係心知不妙，小朋友唔想同人打交道。
但世事邊有得我揀，行到錶位前嘅一架黑色七人車幽蘭就停咗喺度，然後架車開門，十足十綁架小朋友嘅情節。




V：「你上車先啦。」佢真係好有禮貌。
當我坐低嘅時候，見到除咗司機之外佢側邊重有個姨姨。
V：「佢哋係管家先生同工人姨姨，你嗌佢哋做uncle Lau同auntie Florence就得…」媽呀，一個都唔夠…
我：「Uncle Lau，Auntie Florence，你哋好。」
雖然我成世人無享用過下人嘅服務，但都知佢哋大致上係點樣嘅，例如每逢星期日…皇后像廣場就會溢出，令到全香港嘅公園，天橋，M記充斥住佢哋嘅身影，時而高歌，時而跳舞，咇喱巴啦就係佢哋最大嘅特徵。不過眼前嘅佢哋實在非常整齊企理，人貴自知，喺真正有錢人嘅下人面前，你先係真正嘅下人…
管：「放鬆啲就得，好快到小姐屋企㗎喇，我哋頭先已經知道會有同學仔嚟做功課。」
工：「你叫阿爽呀可，一陣如果有乜需要隨便同我講就得㗎喇，同Vienna佢玩得開心啲啦。」無錯呀，唔係錯人設㗎，佢的而且確係一個工人姐姐，睇得出唔係本地人嚟，但同賓賓個樣又有啲距離，加埋一口超流利廣東話，我完全唔使擔心要用英文同人溝通，雖然本身就無呢個打算。
V：「我哋唔係玩呀！真係嚟做功課㗎。」
大佬…你叫我點放鬆心情，重陰功過對住QQ媽咪呀。
開始明白到左女神嘅生活確實係無時無刻都俾人監察住，唔似得QQ咁可以同我喺屋企胡天胡帝，佢唔可以隨時落街玩，無論去到邊都要同人報到，真係會精神病…




V：「欸…你點解唔講嘢嘅？」
我：「呀…有乜嘢好講？」
V：「點知你，平時你喺課室好多廢話㗎。」