為了實現媽媽遺願，我成為了女兒國唐僧: K297

見佢又係雞咁腳向前行，唔通又係我問題？但明明我就好正常頭先交功課班主任都無特別；然後我望住前面兩個背影急步向住同一個方向行，唔通…我諗到啲嘢，呢兩個人上年同班，今年升咗去同一班，所以啲橙皮係有嫌疑，而且上年踢緊社際足球嗰陣，我同阿健落咗場佢哋就係一齊坐喺觀眾席上面睇，怕且隻死貓已經伸咗脷出嚟…
點都好，祝你兩個好運，我呢邊已經七國咁亂理唔到乜…
我：「嘩，你使唔使咁勤力，一邊食飯一路睇片？」著住校服梗係唔會睇鹹片，係傳說啲大神嘅教學短片。
健：「唔勤力啲又點幫你個女神直播喎。」
講吖你，我就唔踢爆你等睇你開心得幾耐，先唔信你會為咗每粒鐘廿蚊而每日練多幾粒鐘，而當然我都唔會同佢講啱啱喺校門見到嘅嘢，費事講人壞話咁缺德。
佢個樣好似有啲攰，但係神情又矛盾地好enjoy。
邊啲人會係咁嘅嘴面？咪吸毒啲癮君子囉…
健：「係嘞，一陣Chem Lab係咪照返Phy Lab咁坐？」
我：「除非你已經諗好咗安排，否則我唔想煩任何嘢。」
健：「你唔係應該可以叫到左右女神同你同組咩？」




我：「可唔可以同會唔會咁做係兩樣嘢，我無必要成日都黐住佢哋，而且跟住我要嗌邊個坐埋落嚟？」
健：「嗯，即係又要繼續同Yvonne一組…」
我：「點呀，你好唔鍾意人哋咩，而家你嘅左手邊同埋右手邊都係女嚟喇，好好珍惜唔好咁多投訴啦。」
健：「唔係嘅，佢對我又無乜嘢，唔似得對你啲態度咁惡劣，一齊做下實驗都OK嘅。」你個傻仔永遠都唔會明白，佢對我態度惡劣係因為我同佢已經熟到互相睇過對方嘅性器官…加埋咁樣可以避免QQ懷疑我哋嘅關係。
返到課室過咗陣睇住瘟神跟住左右女神入嚟，唓，我都知商務午餐係乜意思㗎喇，就係唔方好嘢。
瘟：「我好有誠意拜托兩位㗎，請認真考慮下啦。」佢一路講左右女神都坐返埋位，準備執包袱上Lab。
瘟：「嘩，阿爽你條友仔…齊人之福咁不得之了呀。」
頂你，重要鬼死咁大聲方死我得罪人少咁…
我：「算得啲乜呀，師兄你上年喺個社度咪又係咁。」
瘟：「請你唔好亂講，嗰啲叫見過鬼都怕黑。」




我：「係呀，咁你小心啲今年會換咗兩隻更厲害嘅女鬼。」幽蘭聽到就嘰一聲咁笑咗出嚟。
Q：「講乜呀你！係咪食咗啲唔知乜無嘢屙？」
我：「係呢，想問下師兄你呢個暑假玩得開唔開心？」
瘟：「有乜嘢玩…咁開心呀…係嘞，今年要繼續靠晒你為個社發光發熱！」條友仔明顯咁喺度扮傻。
我：「你言重喇，我呢個人其實無乜貢獻可言。」
瘟：「點會，社際足球我已經預埋你一份㗎喇！」
我：「出年暑假嘅嘢你而家就講會唔會早得滯…」